Skandal në Buckingham, Charles ishte paralajmëruar që në 2019 për lidhjet sekrete të Princit Andrew

Sipas materialeve të zbuluara, një informator i kishte dërguar një mesazh Princit të atëhershëm të Uellsit përmes firmës ligjore Farrer & Co, duke pretenduar se Duka i Jorkut kishte lidhje financiare “sekrete” me financierin David Rowland, i cili dyshohet se shfrytëzonte lidhjen mbretërore për përfitime.

Emaili pohonte se veprimet e Andrew sugjeronin se ai e konsideronte marrëdhënien me Rowland më të rëndësishme se atë me familjen e tij. Një mesazh tjetër i dërguar drejtpërdrejt financierit, dhe i ndarë me sekretarin privat të Charles, Clive Alderton, si dhe me avokatin mbretëror Mark Bridges, pretendonte se ekzistonin prova të qarta për “keqpërdorim të emrit të Familjes Mbretërore”.

Email proves Charles was warned about his brother's 'secret deals': Whistleblower told Palace that Royal Family's name was being 'abused' by Andrew https://t.co/09ihydcCSS pic.twitter.com/V4kBHLA0ss

— FutureTrump2️⃣⏺2️⃣4⃣🍊 (@RealTrump2020_) February 22, 2026

Akuzat më serioze lidhen me pretendimin se Rowland dyshohet se i ka siguruar përfitime financiare Andrew-t për ta ndihmuar të marrë një licencë bankare në Luksemburg për bankën private Banque Havilland. Sipas raportimeve, ai gjithashtu i ka dhënë 40,000 paund ish-bashkëshortes së Andrew-t, Sarah Ferguson, për shlyerje borxhesh dhe ka shlyer një kredi prej 1.5 milion paund në emër të dukës në vitin 2017. Banka në fjalë humbi licencën në vitin 2024 nga Banka Qendrore Evropiane dhe e ka apeluar vendimin.

Dokumentet sugjerojnë gjithashtu se gjatë viteve 2001–2011, kur Andrew shërbente si i dërguar tregtar i Mbretërisë së Bashkuar, ai e mbante Rowland të informuar për mundësi biznesi dhe madje mund të ketë ndihmuar në lehtësimin e një marrëveshjeje të madhe nafte në Kinë me pritje fitimesh së bashku me Jeffrey Epstein. Djali i financierit, Jonathan Rowland, thuhet se mori pjesë në takime zyrtare dhe misione tregtare, ndërsa diplomatët dyshohet se i vunë në dispozicion staf qeveritar.

Çështja ka marrë një kthesë dramatike pasi Andrew u arrestua nën dyshimin për “keqpërdorim të detyrës publike”, një vepër që mund të dënohet deri me burgim të përjetshëm. Ai nuk është akuzuar dhe është liruar nën hetim, ndërsa Policia Metropolitane e Londrës ka nisur kontaktimin e oficerëve aktualë dhe të mëparshëm të sigurisë që kanë shërbyer në rojen e tij.

Skandali ka shkaktuar reagime politike në Britani, me deputetë që kërkojnë hetim të plotë dhe madje ndryshime ligjore për ta hequr Andrew nga linja e trashëgimisë mbretërore. Avokatja amerikane Gloria Allred u bëri thirrje publikisht mbretit dhe familjes mbretërore të bashkëpunojnë me autoritetet nëse kërkohet.

Pallati Buckingham ka refuzuar të komentojë për shkak të hetimit në vazhdim, por zbulimet shtojnë presionin mbi monarkinë britanike dhe ngrenë pikëpyetje nëse paralajmërimet e vitit 2019 u morën seriozisht.

Top Channel