Vrau 51 njerëz në xhamitë e Christchurch në Zelandën e re, Brenton Tarrant apelon dënimin me burgim të përjetshëm 09/02 08:50
Partia Popullore spanjolle ka fituar zgjedhjet lokale të zhvilluara të dielën në Aragon, në verilindje të Spanjës, duke shënuar një tjetër humbje të rëndë për socialistët e kryeministrit Pedro Sánchez dhe një forcim të ndjeshëm të së djathtës ekstreme Vox.
Sipas rezultateve zyrtare me 95% të votave të numëruara, PP ka siguruar 33.5% të votave dhe 26 vende në parlamentin rajonal prej 67 anëtarësh, nga 28 që kishte në legjislaturën e mëparshme. Rreth një milion qytetarë, kryesisht në metropolin e Zaragozës, morën pjesë në procesin e votimit.
Rezultati e bën PP-në edhe më të varur nga Vox për formimin e qeverisë rajonale. Partia e ekstremit të djathtë ka dyfishuar numrin e vendeve të saj, nga 7 në 14, duke arritur rreth 18% të votave, një rritje prej më shumë se 6.5%.
PP dhe Vox kishin qeverisur më herët së bashku në Aragon, nga qershori 2023 deri në korrik 2024, në kuadër të një aleance lokale që u shpërbë për shkak të mosmarrëveshjeve mes drejtuesve të partive në nivel kombëtar.
Nga ana tjetër, Partia Socialiste (PSOE), e përfaqësuar nga Pilar Alegría – ish-zëdhënëse e qeverisë Sánchez – humbi pesë vende, duke mbetur me 18 mandate dhe rreth 24% të votave. Ky është rezultati më i dobët i socialistëve në Aragon në 40 vitet e fundit, që nga rivendosja e demokracisë në Spanjë.
Zgjedhjet në këtë rajon, i cili konsiderohet një nga qendrat kryesore të energjisë së rinovueshme në vend, u zhvilluan në një klimë të tensionuar politike, ndërsa PP dhe Vox po kërkojnë dorëheqjen e kryeministrit Sánchez për shkak të përfshirjes së rrethit të tij personal dhe profesional në disa skandale korrupsioni.
Humbja në Aragon vjen pas një tjetër disfate për PSOE-në në dhjetor në Extremadura, ku partia humbi rreth 14% të elektoratit të saj. Megjithatë, kryeministri Sánchez ka theksuar se parlamenti kombëtar do ta përfundojë mandatin e plotë, i cili përfundon në vitin 2027.
Ndërkohë, një tjetër provë elektorale për forcat politike në Spanjë pritet në mesin e marsit, me zgjedhjet lokale që do të mbahen në rajonin e Castile dhe Leon.
Top Channel
