Mungesë masive e energjisë elektrike në Ukrainë për shkak të sulmeve ruse, probleme edhe në disa zona të Moldavisë 31/01 16:57
Të paktën tre rajone dhe Kievi po përballen me ndërprerje emergjente të energjisë elektrike, dhe sistemi energjetik i Moldavisë u prek gjithashtu nga problemet e Ukrainës.
Rrjeti elektrik i Ukrainës po përjeton ndërprerje masive të energjisë për shkak të një “defekti teknik” në linjat e energjisë që lidhin Ukrainën, Moldavinë dhe Rumaninë, njoftoi Ministri i Energjisë i Ukrainës.
“Sot ndodhi një defekt teknik, duke shkaktuar mbylljen e njëkohshme të linjës 400 kV që lidh rrjetet e energjisë të Rumanisë dhe Moldavisë, si dhe linjës 750 kV që lidh pjesët perëndimore dhe qendrore të Ukrainës”, shpjegoi Ministri Denis Shmyhal në një postim në X.
Metroja e Kievit u mbyll përkohësisht të hënën për shkak të një ndërprerjeje të energjisë elektrike, tha kompania, pasi infrastruktura energjetike e Ukrainës është goditur së fundmi nga një valë sulmesh ruse.
“Për shkak të një ndërprerjeje të energjisë elektrike nga qendrat e jashtme të furnizimit me energji, shërbimet e trenave dhe shkallëve lëvizëse janë pezulluar në metro”, deklaroi Metroja e Kievit në një postim në Facebook.
Ndërkohë, zyrtarët moldavë thanë se sistemi energjetik i Moldavisë u godit nga një ndërprerje emergjente e energjisë elektrike për shkak të problemeve me rrjetin në Ukrainën fqinje, me kryeqytetin Kishinau dhe pjesë të tjera të vendit që përjetuan ndërprerje të energjisë elektrike.
Sipas një deklarate të postuar nga Ministria moldave e Energjisë në aplikacionin Telegram, ndërprerjet në rrjetin e Ukrainës çuan në një rënie të tensionit në njërën nga linjat e energjisë elektrike në Moldavi.
Shumica e zonave në kryeqytetin moldav Kishinau mbetën pa energji elektrike, tha gjithashtu në Telegram kryetari i bashkisë së qytetit Ion Ceban, ndërsa zyrtarët shtuan se edhe semaforët nuk po funksiononin.
Rrjeti elektrik ukrainas ka qenë një nga objektivat kryesore të sulmeve ruse për muaj të tërë, dhe konsumatorët atje janë përballur me ndërprerje të konsiderueshme të energjisë elektrike për javë të tëra.
Top Channel
