“Presidenti nuk dëshiron të shohë njerëz të vrarë në rrugë”, Trump drejt tërheqjes së agjentëve federalë nga Minesota pas telefonatës me guvernatorin e shtetit 26/01 22:18
Italia pritet t’u kërkojë partnerëve të saj në Bashkimin Evropian brenda javës që të përfshijnë Trupën e Gardës Revolucionare Islamike (IRGC) të Iranit në listën evropiane të organizatave terroriste, tha të hënën Ministri i Jashtëm italian Antonio Tajani, duke shënuar një përmbysje të qëndrimit të mëparshëm të Romës.
Deri më tani, Italia ka qenë midis qeverive që i kanë rezistuar përpjekjeve për të përcaktuar Gardën Revolucionare si një organizatë terroriste. Megjithatë, Antonio Tajani tha se shtypja e përgjakshme e protestave antiqeveritare në Iran në fillim të këtij muaji, në të cilën thuhet se u vranë mijëra njerëz, nuk mund të injorohej.
“Humbjet e pësuara nga popullsia civile gjatë protestave kërkojnë një përgjigje të qartë”, shkroi ministri i jashtëm italian në një postim në X, duke shtuar se do ta ngrinte çështjen të enjten në një takim të ministrave të jashtëm të BE-së në Bruksel.
“Unë do të propozoj, në koordinim me partnerë të tjerë, përfshirjen e Gardës Revolucionare në listën e organizatave terroriste, si dhe vendosjen e sanksioneve individuale ndaj atyre që janë përgjegjës për këto akte të tmerrshme”, vuri në dukje ai.
#Iran Le perdite subite dalla popolazione civile durante le proteste impongono una risposta chiara.
Giovedì alla riunione dei Ministri degli Esteri europei a Bruxelles proporrò, in coordinamento con gli altri partner, l’inclusione dei Guardiani della Rivoluzione nella lista…— Antonio Tajani (@Antonio_Tajani) January 26, 2026
Përcaktimi i Gardës Revolucionare si një organizatë terroriste do të shkaktonte një sërë masash ligjore, ekonomike dhe diplomatike që do të kufizonin ndjeshëm aftësinë e organizatës për të vepruar në Evropë.
Korpusi i Gardës Revolucionare Islamike u themelua pas Revolucionit Islamik të vitit 1979 në Iran dhe mban një ndikim të fortë në vend, duke kontrolluar pjesë të rëndësishme të ekonomisë dhe forcave të armatosura. Është gjithashtu përgjegjës për programet e raketave balistike dhe bërthamore të Iranit.
Ndërsa disa shtete anëtare të BE-së kanë kërkuar më parë që IRGC të listohet si një organizatë terroriste, të tjerët kanë qenë më të kujdesshëm, duke pasur frikë se një veprim i tillë do të çonte në një ndërprerje të plotë të marrëdhënieve me Teheranin. Këto shqetësime sugjerojnë se një veprim i tillë mund të minojë çdo perspektivë për rifillimin e bisedimeve mbi programin bërthamor të Iranit dhe të rrezikojë përpjekjet për të liruar qytetarët e BE-së të mbajtur në burgjet iraniane.
Megjithatë, shtypja e dhunshme e protestave të fundit në Iran ka rindezur debatin dhe i ka dhënë një shtysë të re diskutimeve mbi përfshirjen e IRGC-së në listën terroriste evropiane. IRGC tashmë i nënshtrohet sanksioneve të BE-së për shkelje të të drejtave të njeriut.
Më herët këtë muaj, diplomatët italianë, francezë dhe spanjollë shprehën rezerva gjatë një takimi në Bruksel në lidhje me shtimin e Gardës Revolucionare në listë, thanë burime diplomatike të BE-së për Reuters në atë kohë. Nëse Franca vazhdon ta kundërshtojë atë, iniciativa për të vendosur sanksione ndaj IRGC-së mund të dështojë, thanë diplomatët.
Në një deklaratë të lëshuar më vonë atë mbrëmje, Antonio Tajani theksoi se “prioriteti kryesor” i Italisë mbeti mbrojtja e qytetarëve italianë. Ai shtoi gjithashtu se kishte urdhëruar një reduktim të ndjeshëm të stafit në ambasadën italiane në Teheran, me kthimin e stafit në Itali shumë shpejt.
Top Channel
