Shefi dhe dy policë të stacionit të policisë në Orikum janë lënë në arrest shtëpiak pasi dyshohet se i kanë marrë një shumë parash një shtetasi duke i premtuar shmangien e arrestimit.
AMP bën me dije se pas një hetimi disa mujor u vërtetua se shtetasit D. L., me detyrë Inspektor krimesh pranë Stacionit të Policisë Orikum, A. J., me detyrë Shef i Stacionit të Policisë Orikum dhe A. F., me detyrë Specialist i Policimit në Zonë pranë Stacionit të Policisë Orikum i morën një shtetasi 270 mijë lekë në këmbim të shmangies së përgjegjësisë penale.
Njoftimi i AMP:
Agjencia e Mbikëqyrjes Policore (Drejtoria e Hetimit dhe Drejtoria Rajonale Vlorë – Gjirokastër) ka ekzekutuar vendimin e Gjykatës së Posaçme të Shkallës së Parë për Korrupsionin dhe Krimin e Organizuar, e cila ka caktuar masën e sigurimit personal me karakter shtrëngues “Arrest në shtëpi” parashikuar nga neni 237 i Kodit të Pr. Penale, ndaj punonjësve të policisë;
▶️ D. L., me detyrë Inspektor krimesh pranë Stacionit të Policisë Orikum;
▶️ A. J., me detyrë Shef i Stacionit të Policisë Orikum;
▶️ A. F., me detyrë Specialist i Policimit në Zonë pranë Stacionit të Policisë Orikum;
të dyshuar për kryerjen e veprave penale “Korrupsion pasiv i personave që ushtrojnë funksione publike” në bashkëpunim dhe “Shpërdorim i detyrës”, parashikuar nga nenet 259, 248 dhe 25 të Kodit Penal.
Drejtoria e Hetimit është vënë në dijeni se këta punonjës policie, në shtator të vitit të kaluar, në kundërshtim me ligjin dhe duke keqpërdorur atributet që iu jep funksioni, kanë kërkuar dhe marrë nga një shtetas shumën prej 270 000 lekësh, në këmbim të shmangies nga përgjegjësia penale.
Pas hetimit disa mujor me metoda speciale në drejtimin e SPAK, u bë i mundur dokumentimi me prova ligjore i implikimit të punonjësve të policisë në veprime korruptive dhe shpërdorim të detyrës.
Vijojnë hetimet për zbardhjen e plotë të rrethanave të ngjarjes.
Top Channel
