Rreth orës 10:00 të ditës së mërkurë, e shoqëruar nga forca të shumta policie dhe me eskortën e saj, ka mbërritur në qytetin e Vlorës Ivanka Trump, vajza e presidentit të Shteteve të Bashkuara të Amerikës, Donald Trump.
Pasi ka kaluar në zonën e rrugës Transballkanike, eskorta e Ivanka Trump është drejtuar përgjatë Lungomares dhe më pas në zonën e Ujit të Ftohtë, ku është akomoduar në një nga hotelet e asaj zone. Ivanka Trump ka qëndruar rreth gjashtë minuta në ambientet e hotelit dhe më pas, së bashku me eskortën e saj dhe forcat e Policisë së Vlorës, është larguar sërish.
Më tej, ajo është drejtuar në zonën e Novoselës, konkretisht pranë Hidrovorit, dhe për të vijuar më pas drejt zonës së Zvërnecit. Në itinerarin e saj ka qenë gjithashtu edhe zona bregdetare e njohur si Porto Novo.
Në këto momente, Ivanka Trump raportohet se ndodhet ende në këtë zonë. Ndërkohë, axhenda e saj për ditën e sotme apo për ditën e nesërme nuk është bërë publike nga përfaqësuesit e saj.
Top Channel
