Numri i lindjeve në Kinë kap shifrat më të ulëta në historinë e vendit, popullsia e superfuqisë aziatike bie për të katërtin vit radhazi 19/01 17:06
Pentagoni ka vendosur rreth 1500 ushtarë aktivë në gatishmëri për një vendosje të mundshme në Minesota, ndërsa Presidenti i SHBA-së Donald Trump shqyrton mundësinë e aktivizimit të Aktit të Kryengritjes për herë të parë në shekullin e 21-të.
Ky veprim vjen mes tensioneve të larta midis autoriteteve shtetërore dhe federale për shkak të vdekjes së Renee Nicole Good, një nënë nga Minneapolis, e cila u qëllua për vdekje nga një agjent i Imigracionit dhe Doganave (ICE). Ushtarët në gatishmëri thuhet se janë nga Divizioni i 11-të Ajror me bazë në Alaskë, sipas raportimeve të mediave amerikane.
Megjithatë, Pentagoni nuk e ka konfirmuar dhe as mohuar zyrtarisht numrin e trupave. Zëdhënësi i Departamentit të Mbrojtjes, Sean Parnell, tha se “Departamenti i Luftës është gjithmonë i gatshëm të zbatojë urdhrat e komandantit të përgjithshëm, nëse kërkohet”, duke sqaruar se, aktualisht, nuk ka një plan aktiv për të dërguar trupa në Minesota.
Mundësia e një pranie ushtarake në rrugët e Minneapolis ka shkaktuar reagime të forta në nivel lokal. Kryetari i bashkisë së qytetit, Jacob Frey, e quajti një mundësi të tillë një “hap tronditës”, duke paralajmëruar se kjo do të përkeqësonte klimën. “E dini çfarë shkakton më shumë kaos? Prania e mijëra agjentëve të ICE-së, agjentëve të Patrullës Kufitare dhe, potencialisht, ushtrisë në rrugët tona”, tha ai.
Tensionet kanë arritur kulmin në ditët e fundit pasi Trump kërcënoi publikisht se do të aktivizonte Aktin e Kryengritjes nëse “politikanët e korruptuar” nuk “zbatojnë ligjin dhe nuk ndalojnë protestuesit dhe protestuesit profesionistë”. Të nesërmen, ai dukej se e zbuti retorikën e tij, por Zëvendës Prokurori i Përgjithshëm Todd Blanch e la të hapur mundësinë e ndërhyrjes ushtarake, duke vënë në dukje se nëse presidenti vazhdon me këtë vendim, ai do të ketë mbështetjen e plotë të Departamentit të Drejtësisë.
Ndërkohë, sondazhet tregojnë pakënaqësi të fortë publike me praktikat e ICE-së. Shumica e amerikanëve besojnë se agjencia vepron shumë ashpër, ndërsa më shumë se gjysma nuk e miratojnë mënyrën se si zbatohet politika e imigracionit në përgjithësi. Presioni publik po intensifikohet ndërsa mijëra agjentë federalë janë vendosur në shtet.
Guvernatori i Minesotës, Tim Walz, i ka bërë thirrje Trump dhe Sekretares së Sigurisë Kombëtare, Kristi Noem, që të ndalojnë atë që ai e quajti “pushtim”, ndërsa u ka bërë thirrje qytetarëve të protestojnë në mënyrë paqësore. Blanch, nga ana e tij, i ka akuzuar Walz dhe Frey për “terrorizëm”, me Departamentin e Drejtësisë që ka nisur një hetim ndaj tyre për pengim të detyrës së autoriteteve federale.
Mineapolis është bërë një pikë e nxehtë kombëtare, me video të përleshjeve midis qytetarëve dhe agjentëve federalë që kanë mbushur mediat sociale.
Top Channel
