Kërcënimet e Trump ndaj BE-së dhe përplasjet SHBA-Mbretëri e Bashkuar, Starmer: Çdo vendim për Groenlandën i takon vetëm… 19/01 11:02
Popullsia e Kinës ka shënuar rënie për të katërtin vit radhazi në vitin 2025, ndërsa normat e lindjeve kanë zbritur në nivelin më të ulët historik, pavarësisht përpjekjeve të shumta të qeverisë për t’i rritur ato.
Sipas të dhënave zyrtare të publikuara të hënën, popullsia e vendit u tkurr me 3.39 milionë banorë, duke arritur në rreth 1.4 miliardë deri në fund të vitit 2025. Rënia është më e shpejta krahasuar me një vit më parë.
Shkalla e lindjeve ra në 5.63 për 1,000 banorë, niveli më i ulët që nga viti 1949, kur Partia Komuniste mori pushtetin. Ndërkohë, shkalla e vdekshmërisë u rrit në 8.04 për 1,000 banorë, më e larta që nga viti 1968.
E përballur me plakjen e popullsisë dhe ngadalësimin ekonomik, Kina ka ndërmarrë politika të shumta për të inkurajuar lindjet. Pas heqjes së politikës së një fëmije në vitin 2016 dhe lejimit të dy fëmijëve, autoritetet miratuan në vitin 2021 edhe mundësinë e tre fëmijëve për çift.
Së fundmi, qeveria ka ofruar subvencione prej 3,600 juanësh për çdo fëmijë nën moshën tre vjeç, ndërsa disa provinca kanë shtuar bonuse dhe leje më të gjata lindjeje. Megjithatë, disa masa kanë shkaktuar polemika, përfshirë vendosjen e një takse 13% mbi kontraceptivët, që ka ngritur shqetësime për shtatzëni të padëshiruara dhe rritje të rrezikut të HIV-it.
Kina renditet ndër vendet me normën më të ulët të fertilitetit në botë, me rreth një lindje për grua, shumë nën nivelin e zëvendësimit prej 2.1. Sipas ekspertëve të OKB-së, popullsia kineze pritet të vazhdojë rënien dhe mund të përgjysmohet deri në vitin 2100.
Tkurrja e popullsisë paraqet sfida serioze ekonomike dhe sociale, duke ulur fuqinë punëtore dhe duke rritur presionin mbi sistemin e pensioneve, i cili sipas Akademisë Kineze të Shkencave Sociale po shkon drejt shterimit.
Top Channel
