Pse Gjenerata Z po i rikthehet fesë, ja çfarë tregon studimi i ri në Mbretërinë e Bashkuar 14/01 13:22
Donald Trump deklaroi se SHBA do të ndërmarrë “veprime shumë të forta” kundër Iranit nëse ai ekzekuton protestuesit, siç po raportohet në mediat ndërkombëtare.
Më herët, kreu i Shtëpisë së Bardhë i inkurajoi tubuesit iranianë të vazhdojnë protestat e tyre dhe të marrin nën kontroll institucionet e vendit, duke i siguruar se “ndihma po vjen”.
Trump u kërkoi gjithashtu që të dokumentohen dhe të ruhen emrat e atyre që janë përgjegjës për vrasjet dhe abuzimet ndaj protestuesve, duke theksuar se këto veprime nuk duhet të mbeten pa përgjegjësi.
Deklarata e fundit e tij bëhet në kohën kur të afërmit e 26-vjeçarit, Erfan Soltani i treguan të dëshpëruar BBC Persian se i riu pritet të ekzekutohet sot.
Të paktën 12 meshkuj janë ekzekutuar në Iran gjatë tre viteve të fundit pasi u dënuan me vdekje për pjesëmarrje në protestat që shpërthyen në 2022-shin pas vdekjes në paraburgim të 22-vjeçarja Mahsa Amini, e cila u akuzua nga policia e moralit se e mbante hixhabin “në mënyrë të papërshtatshme”.
Trump duket se është duke shqyrtuar edhe ndërhyrjen ushtarake ndaj regjimit të ajatollahëve, pasi e ka hedhur tashmë një hap të parë duke njoftuar vendosjen e tarifave 25% ndaj çdo vendi që tregton me Iranin.
Qeveria e Iranit ka akuzuar SHBA-në se po kërkon të “sajojë një pretekst për ndërhyrje ushtarake”, duke paralajmëruar se “ky skenar ka dështuar edhe më parë”.
Dhe duket se lëvizjet e tij janë shumëpalëshe. Axios raporton se i dërguari i posaçëm i SHBA-së, Steve Witkoff, u takua fshehurazi me princin iranian, Reza Pahlavi gjatë fundjavës për të diskutuar protestat në Iran. “Ka pasur një rritje të popullaritetit të Pahlavit.
Ata po brohorasin emrin e tij në demonstrata në shumë qytete, dhe duket se kjo po ndodh realisht”, u citua të ketë thënë zyrtari amerikan.
Top Channel
