Gjykata kushtetuese ka vendosur datën se kur do të shqyrtojë në seancë plenare çështjen ndaj Arben Frrokut i dënuar nga gjykata e lartë me burg të përjetshëm për vrasjen e komisarit Dritan Lamaj.
Siç raporton Anila Hoxha në datën 17 shkurt 2026 gjyqtarët kushtetues shqyrtojnë në kërkesën e të akuzuarit i cili ka kërkuar Rihapje e procesit. Frroku i cili besohet se gjendet në Holandë kërkon edhe shfuqizimin si antikushtetues të vendimeve nr. 73, datë 29.06.2015 të ish-Gjykatës së Apelit për Krime të Rënda, nr. 443, datë 08.06.2017 të Kolegjit Penal të Gjykatës së Lartë si dhe kthimin e çështjes për rigjykim pranë gjykatës kompetente duke urdhëruar rigjykimin e saj me tjetër trup gjykues.
Arben Frroku fillimisht mori pafajësi nga gjykata e krimeve të rënda duke mos e njohur rrëfimin e dëshmitarit të mbrojtur mbi atentatin në derën e shtëpisë të komisarit Lamaj, i cili u ekzekutua barbarisht në shkurt 2013 pak ditë pasi e kishin transferuar nga detyra e shefit të komisariatit të Kombinatit në një specialist të thjeshtë.
Në apel Frroku u dënua me burg të përjetshëm por ndërkohë ai ishte arratisur nga Shqipëria dhe u zbulua me identitet të rreme jashtë vendit. Ai ende nuk është ekstraduar.
Top Channel
