Analiza nga DW: Shumë lëvdata, pak zgjidhje. Trump nën presion 19/12 09:21
Donald Trump tha të enjten se nuk ka nevojë për miratimin e Kongresit për të urdhëruar sulme ndaj Venezuelës, duke shtuar se është i shqetësuar për rrjedhjet e informacionit.
“Nuk do të më vinte keq t’u thoja atyre. Nuk kam nevojë”, tha presidenti republikan kur u pyet nga një gazetar nëse planifikon të kërkojë miratimin e Kongresit për sulme tokësore ndaj Venezuelës.
“Shpresoj vetëm që informacioni të mos rrjedhë. E dini, disa njerëz nxjerrin gjëra të tilla. Ata politikanë janë si kullesa”, tha ai.
Presidenti amerikan ka kërcënuar vazhdimisht në muajt e fundit se do të urdhërojë sulme në tokën venezueliane kundër karteleve të drogës.
Që nga shtatori, ushtria amerikane ka bombarduar anije të dyshuara për përfshirje në trafikun e drogës, operacione që kanë vrarë të paktën 99 persona, megjithatë, ligjshmëria e këtyre sulmeve po vihet në dyshim nga ekspertët.
Politikanët si nga demokratët e opozitës ashtu edhe nga shumica presidenciale në Kongres besojnë se Donald Trump nuk ka autoritetin ligjor për të urdhëruar sulme tokësore në Venezuelë pa miratimin e Kongresit.
Por Dhoma e Përfaqësuesve, në të cilën republikanët kanë shumicën, hodhi poshtë dy tekste të mërkurën që synonin vendosjen e sulmeve amerikane në një kornizë ligjore. Iniciativa të ngjashme në Senat nuk kanë çuar askund.
“Presidenti nuk ka treguar se ka autoritetin e nevojshëm, sipas ligjit amerikan ose ndërkombëtar”, për këto sulme, theksoi përfaqësuesi demokrat Gregory Meeks në debatin në dhomën e ulët.
“Askush nuk mund të thotë me bindje se këto anije, të cilat në disa raste as nuk ishin drejtuar për në Shtetet e Bashkuara dhe ishin mijëra milje larg territorit amerikan, përbënin një kërcënim të menjëhershëm”, shtoi ai.
Administrata Trump argumenton se presidenti po ushtron të drejtat e tij, pasi këto bombardime po kryhen në kontekstin e “konfliktit të armatosur” kundër karteleve të drogës, tashmë të përcaktuara si “organizata të huaja terroriste”.
Sipas Kushtetutës së SHBA-së, megjithëse presidenti është për nga përkufizimi kreu i forcave të armatosura, vetëm Kongresi ka autoritetin për të shpallur zyrtarisht luftë.
Por për dekada, në vend të një deklarate zyrtare lufte, njëri president pas tjetrit ka preferuar të mbështetet në një vendim të parlamentit për të urdhëruar operacione ushtarake jashtë vendit, duke filluar nga Afganistani.
Ky “Autorizim për Përdorimin e Forcës Ushtarake” (AUMF), i miratuar në vitin 2011, pas sulmeve të 11 shtatorit, është ende në fuqi.
Top Channel
