Liverpool, pas një periudhe tensioni, do të zhvillojë këtë të premte një bisedë vendimtare mes trajnerit Arne Slot dhe yllit të tij Mohamed Salah, pas deklaratave të fundit të egjiptianit që nënkuptonin një largim të mundshëm nga klubi.
Salah, 33 vjeç, u përjashtua nga skuadra e Liverpool për ndeshjen kundër Inter Milan të martën, pas një interviste të dhënë pas barazimit me Leeds, ku ai tha se ishte “hequr nën autobus” dhe se marrëdhënia e tij me trajnerin Arne Slot ishte “thyer”. Ky koment i Salah solli spekulime në lidhje me të ardhmen e tij në Anfield, duke ngjallur dyshime nëse sulmuesi mund të kishte luajtur ndeshjen e tij të fundit për Liverpool.
Duke pasur parasysh se Salah pritet të bashkohet me Egjiptin për para-gatitet e Kupës së Kombeve të Afrikës javën e ardhshme, ka pasur pyetje në lidhje me të ardhmen e tij në klub. Megjithatë, Arne Slot ka konfirmuar se do të zhvillojë një bisedë të drejtpërdrejtë me Salah këtë mëngjes për të diskutuar situatën dhe për të gjetur një rrugëdalje.
Në një konferencë për shtyp para ndeshjes së Liverpool kundër Brighton nesër, Slot tha: “Do të bisedoj me Mo këtë mëngjes. Rezultati i atij bisedimi do të përcaktojë se si do të veprojmë më tej.”
“Unë kam nevojë për një bisedë me të, dhe herën tjetër që do të flas për Mo, duhet të jetë me të dhe jo këtu në këtë sallë”, shtoi ai. “Nuk ka shumë më tepër që mund të them. Do të flas me të sot dhe rezultati do të përcaktojë se si do të duket situata nesër.”
Slot gjithashtu theksoi se kishte pasur shumë biseda në javët e fundit, duke përfshirë ato mes përfaqësuesve të Salah dhe stafit të Liverpool. “Kemi folur shumë gjatë javës së fundit, që nga ndeshja kundër Sunderland,” përfundoi trajneri i Liverpool.
Top Channel
