Trump prezanton “vizat e arta”… në vlerë 1 milion dollarë 11/12 11:33
María Corina Machado thuhet se ka lënë Venezuelën të martën me mbështetjen e SHBA-së. Udhëheqësja e opozitës u largua me varkë nga bregu perëndimor i Venezuelës me destinacion ishullin Curaçao, sipas zyrtarëve amerikanë që folën për The Wall Street Journal.
Arratisja e saj dukshëm klandestine ndodhi vetëm një ditë para ceremonisë së Çmimit Nobel për Paqen, duke bërë që Machado të mos mbërrinte në kohë për ta marrë çmimin, i cili iu dorëzua vajzës së saj, Ana Corina Sosa Machado. Machado premtoi të paraqitej në Oslo, ashtu siç ua kishte thënë vetë organizatorëve të Çmimit Nobel për Paqen, duke qetësuar kështu shqetësimet për vendndodhjen dhe sigurinë e saj.
Ky është informacioni më konkret i publikuar deri tani lidhur me largimin e udhëheqëses së opozitës venezueliane nga vendi. Thashethemet për operacionin kanë qarkulluar prej ditësh, të nxitura madje edhe nga vetë chavizmi, i cili përhapi idenë se Machado kishte qenë jashtë Venezuelës prej disa kohësh.
Spekulimet e kanë vendosur atë në një automjet diplomatik duke kaluar kufirin drejt Kolumbisë dhe madje në një nga avionët amerikanë që zbritën në vend për të kthyer migrantë venezuelianë të deportuar. Ka pasur gjithashtu spekulime nëse largimi i saj kishte ose jo bashkëpunimin e regjimit.
Udhëtimi i saj drejt Oslos nuk kishte për të qenë kurrë i lehtë. Machado ka qenë në arrati për 16 muaj për të shmangur arrestimin nga qeveria e Nicolás Maduro-s. Më shumë se 100 bashkëpunëtorë të saj janë të burgosur, dhe shumë të tjerë janë detyruar të fshihen ose të marrin rrugën e mërgimit për të shmangur kapjen nga shërbimet e inteligjencës chaviste.
Vështirësive të saj për t’u larguar i shtohet edhe pasiguria nëse do të jetë në gjendje të kthehet në Venezuelë. Përveç ndjekjes së drejtpërdrejtë që ka përjetuar gjatë vitit të kaluar, regjimi chavist ka lëshuar një ndalim udhëtimi ndaj saj më shumë se një dekadë më parë, kur ajo ishte anëtare e parlamentit.
The Wall Street Journal raporton se aleatët e udhëheqëses së opozitës bënë përpjekje të jashtëzakonshme për ta mbajtur udhëtimin sekret për të mbrojtur sigurinë e saj. Në një telefonatë me kryetarin e Komitetit të Nobelit, Jørgen Watne Frydnes, e publikuar në faqen e Çmimit për Paqen, Machado deklaroi se “shumë njerëz” kishin rrezikuar jetën e tyre për t’i mundësuar asaj udhëtimin për në Oslo.
“Jam shumë mirënjohëse ndaj tyre. Dhe kjo është një dëshmi e asaj se çfarë do të thotë ky vlerësim për popullin venezuelian,” tha ajo, duke shtuar se ishte gati të hipte në avion. “Jemi shumë të emocionuar dhe shumë të nderuar, dhe për këtë arsye jam shumë e trishtuar dhe kërkoj falje që nuk do të mund të mbërrij në kohë për ceremoninë, por do të jem në Oslo. Jam në rrugë për në Oslo tani.”
Komiteti Nobel nuk specifikoi se kur ka ndodhur telefonata apo ku ndodhej Machado në atë moment. Pak orë më herët, drejtori i institutit, Kristian Berg Harpviken, i kishte thënë transmetuesit publik norvegjez NRK se sjellja e Machado-s në Oslo kishte qenë më e ndërlikuar sesa pritej. “Ajo jeton nën kërcënimin e vdekjes nga regjimi, thjesht dhe qartë,” tha ai. “Ai shtrihet përtej kufijve të Venezuelës, nga regjimi dhe bashkëpunëtorët e tij në mbarë botën.”
Në maj, pesë prej ndihmësve kryesorë të Machado-s, të cilët kishin qëndruar për një vit të strehuar në ambasadën argjentinase në Caracas — e cila ishte e rrethuar fort nga policia e Maduro-s — arritën të largoheshin në një operacion sekret të mbështetur nga SHBA-të, detajet e të cilit mbeten ende të panjohura.
Top Channel
