Në një renditje hipotetike të futbollistëve jo-britanikë më të dashur në stadiumin Etihad gjatë këtij shekulli, Pablo Zabaleta do të ishte padyshim një nga emrat e parë.
Argjentinasi, i lindur në Buenos Aires në vitin 1985, veshi fanellën blu për nëntë sezone (2008–2017), luajti 333 ndeshje, mbajti edhe shiritin e kapitenit dhe mori një lamtumirë emocionale që la gjurmë tek tifozët.
Sot, Zabaleta është pjesë e stafit teknik të Kombëtares së Shqipërisë si asistent i Sylvinhos, por lidhja e tij me Cityn mbetet e fortë. Ai do të jetë në “Santiago Bernabéu”, si i ftuar i klubit anglez, për të ndjekur supersfidën e Champions League.
Intervista e plotë me Pablo Zabaletën (AS)
– A jeni ende i përfshirë në futboll?
“Është e pamundur të mos jesh. Unë jetoj me familjen time në Barcelonë, por udhëtoj shpesh në Tiranë. Futbolli do të jetë gjithmonë pjesë e imja.”
– Do të jeni në Bernabéu?
“Po. Sa herë që mundem, shkoj në Etihad sepse, kur u largova nga klubi tetë vjet më parë, më dhanë një kartë anëtarësimi për jetë. Kësaj radhe jam i ftuar në Madrid. Nuk mund ta humbas një ndeshje të tillë.”
– A është City favorit i qartë?
“Nuk mund ta injorojmë realitetin. Në bazë të formës aktuale, City është favorit, por nuk mund të nënvlerësojmë Real Madridin. Rezultatet e tyre nuk janë të mira, por ata meritojnë shumë respekt, sidomos në stadiumin e tyre kur luhet himni i Champions League.”
– Ka tifozë të Realit që kanë frikë nga një humbje e thellë…
“Çdo gjë është e mundur. Real Madridi ka probleme të mëdha në mbrojtje, ndërsa City ka sulmues vendimtarë dhe shumë të rrezikshëm. Nëse Real Madridi humbet përqendrim, nuk do ta përjashtoja këtë skenar. Duke parë nivelin e sulmit të City-t, është e frikshme. Xabi do të duhet të mbyllë linjat, të mbrojë hapësirat dhe të ketë një plan perfekt mbrojtës.”
– A është City më i brishtë se vitet e kaluara?
“Po. Ata po pësojnë më shumë gola. Guardiola do të mundohet të shmangë tranzicionet e shpejta, në mënyrë që Vinicius dhe Mbappé të mos marrin topa në hapësirë.”
– A është City më i konsoliduar si ekip?
“Sigurisht. Guardiola është aty prej shumë vitesh, dhe ndikimi i tij është i dukshëm. Ekipi ka evoluar: tani kanë më pak posedim dhe kërkojnë lojë më direkte. Nuk janë më aq të varur nga qarkullimi i topit.”
– Cilat janë mangësitë e Real Madridit?
“Dy lojtarë të pazëvendësueshëm: Kroos dhe Modric. Mungesa e tyre është një goditje e madhe. Loja nuk është fluide, nuk krijojnë raste dhe mbështeten shumë te topat e gjatë. U mungon një lider në mesfushë.”
– Cila është zgjidhja?
“Nuk është e thjeshtë. Ata kanë nevojë për një lider në mesfushë që merr përgjegjësinë. Güler mund të bëhet ai lojtar, por është ende në rritje.”
– Kush mund ta mbajë këtë rol?
“Rikthimi i Nico Paz mund t’i ndihmojë. Ai sjell dinamizëm. E shoh gati për t’u përballur me këtë sfidë. Është një rast si Palmer te Chelsea: kërkonte hapësirë, e gjeti dhe shpërtheu.”
– A i mungon Modrici Realit më shumë se De Bruyne City-t?
“Mendoj se po. City ka lojtarë që kompensojnë, ndërsa mungesa e Modric është shumë e madhe dhe nuk është zëvendësuar.”
– Kush është më vendimtar: Haaland apo Mbappé?
“E pamundur të zgjedh. Të dy janë fenomenalë. Por Mbappé është më i izoluar te Real Madridi, ndërsa Haaland ka shumë alternativa rreth tij.”
– A është Doku në nivelin e Viniciusit?
“Po e arrin atë nivel. Ai është driblues i jashtëzakonshëm dhe shumë i shpejtë. Po përmirëson vendimet e fundit dhe po rritet shumë.”
– Për Foden dhe Brahim… A e prisnit që të arrinin këtu?
“I kujtoj shumë të rinj, të dobët fizikisht, dhe kishim dyshime për ritmin e Premier League. Teknikisht ishin të pabesueshëm dhe e treguan.”
– Për Nico Paz?
“Një zbulim. Ai i përshtatet profilit perfekt, ka marrë vetëbesim dhe është kthyer në lojtar kyç.”
– Cili lojtar i City-t ju pëlqen më shumë?
“Cherki ka shkëlqim, por Reijnders ka qenë një sukses i madh. Ai është Gündogan i ri.”
– Cili lojtar i Realit, përveç Mbappé, ju pëlqen më shumë?
“Jam një tifoz i madh i Valverdes. Ai shkëlqen kudo dhe është pasqyrë e intensitetit modern.”
“Sinqerisht, nuk mund të parashikoj. City po vjen në rritje, luan më mirë, por Bernabeu e barazon çdo gjë. Mistika e atij stadiumi është imponuese dhe duhet marrë seriozisht.”
Top Channel
