Lando Norris u shpall për herë të parë kampion bote në Formula 1 në Abu Dhabi, dhe në garën e tij historike ishte e pranishme edhe partnerja e tij, modelja dhe aktorja portugeze Magui Corceiro, e cila u bë një nga figurat më të fotografuara gjatë fundjavës.
Norris siguroi titullin pas një vendi të tretë vendimtar, duke lënë pas katër herë kampionin Max Verstappen dhe shokun e skuadrës te McLaren, Oscar Piastri. Menjëherë pas kalimit të vijës së finishit, britaniku u përqafua me partneren e tij, me të cilën është lidhur për herë të parë në vitin 2023.
Magui, 23 vjeç, e cila ka mbi 2.3 milionë ndjekës në Instagram, publikoi para garës disa foto të një fushate të re të një brandi italian mode.
Postimi i saj mori reagime të shumta nga fansat, ndërsa praninë e saj në paddock e kanë vlerësuar edhe mediat ndërkombëtare, ku ajo tashmë konsiderohet një nga fytyrat më të njohura mes të ashtuquajturave WAGs të F1, ndërsa disa vite më parë ajo kishte qenë e dashura e yllit portugez, Joao Felix.
Pas garës, Corceiro iu bashkua Norris në festën ekskluzive në W Hotel pranë pistës Yas Marina, ku kampioni i ri i botës u pa duke kënduar “Sweet Caroline” dhe “We Are The Champions” së bashku me fansa dhe miq. Në festë morën pjesë edhe piloti i Ferrarit, Charles Leclerc, dhe e fejuara e tij Alexandra Saint Mleux.
Norris u shfaq shpërthyes edhe në konferencën për shtyp, duke pranuar me humor se kishte nisur festimet para kohe.
“Ndoshta është hera ime e vetme që festoj një titull kështu — shpresoj shumë që jo,” tha ai. “Dua të shijoj çdo moment. Shumë pak njerëz përjetojnë këtë që po përjetoj unë sot.”
Britaniku falënderoi miqtë, familjen dhe ekipin, duke theksuar rolin vendimtar të mekanikëve dhe inxhinierëve të McLaren. Prindërit e tij, Adam Norris dhe Cisca Wauman, ishin gjithashtu të pranishëm në Abu Dhabi për të festuar suksesin historik të djalit të tyre.
Norris bëhet piloti i 11-të britanik që fiton titullin e kampionit të botës në Formula 1, duke hapur një kapitull të ri në karrierën e tij dhe në historinë e McLaren.
Top Channel
