Bisedimet SHBA-Ukrainë përfundojnë pa përparim të qartë, Zelensky sytë nga Evropa: Ukraina është e përkushtuar për paqen e vërtetë 07/12 15:46
Presidenti Trump u dorëzoi mbrëmjen e kaluar medaljet e nderuarve të Qendrës Kennedy për vitin 2025 artistëve, në përzgjedhjen e të cilëve ai tha se ishte thellësisht i përfshirë si “ndoshta klasa më e arrirë dhe më e njohur” e prodhuar ndonjëherë.
Fituesit e këtij viti janë aktori Sylvester Stallone, këngëtarët Gloria Gaynor dhe George Strait, grupi rok Kiss dhe aktori-këngëtari Michael Crawford.
Trump i përshkroi ata si një grup “njerëzish të jashtëzakonshëm” që përfaqësojnë “më të mirën e arteve dhe kulturës amerikane”. “I njoh shumicën prej tyre dhe kam qenë fans i të gjithëve”, tha presidenti.
“Ky është një grup ikonash, puna dhe arritjet e të cilëve kanë frymëzuar, ngritur moralin dhe bashkuar miliona amerikanë. Ndoshta klasa më e arrirë dhe më e njohur e të nderuarve të Qendrës Kennedy që është mbledhur ndonjëherë”, tha ai.
Gjatë mandatit të tij të parë, z. Trump kishte injoruar Qendrën Kennedy dhe programin e saj të çmimeve. Por pas rikthimit në detyrë në janar, ai ndërmori disa ndryshime, më e rëndësishmja shkarkimi i bordit të administratorëve dhe zëvendësimi i tyre me mbështetës republikanë që e zgjodhën atë kryetar të bordit. Kjo shkaktoi anulime shfaqjesh nga disa artistë dhe dorëheqje të anëtarëve të stafit.
Ndryshimet u miratuan pasi Shtëpia e Bardhë akuzoi institucionin se ishte “i zgjuar” dhe nisi një rishikim të detajuar të financave të tij në fillim të vitit.
Sipas Qendrës Kennedy dhe presidentit Trump, medaljet e reja janë projektuar dhe dhuruar nga argjendaria Tiffany & Co. Ato janë disqe ari të gdhendur me imazhin e Qendrës Kennedy dhe ngjyrat e ylberit në një anë, ndërsa në anën tjetër mbajnë emrin e të nderuarit dhe datën e ceremonisë. Medaljoni është i varur në një fjongo blu, duke zëvendësuar fjongon tradicionale me ngjyrat e ylberit dhe tre pllaka ari.
I pari që mori medaljen ishte George Strait, i cili mbante një kapelë kauboji. Ndërsa këngëtari nisi ta hiqte kapelen, z. Trump i tha: “Nëse doni ta lini, mund ta mbani. Mendoj se mund ta bëjmë.” Megjithatë, Strait e hoqi kapelen.
Për mikun e tij Stallone, Trump foli me entuziazëm të veçantë, duke e cilësuar si “të mrekullueshëm”, “spektakolar”, “një nga yjet e mëdhenj të filmit” dhe “një nga legjendat e mëdha”. Ai e quajti grupin Kiss një “grup roku të jashtëzakonshëm”.
Në Kopshtin e Trëndafilave, pak jashtë Zyrës Ovale, u luajtën këngë nga Gaynor dhe Kiss ndërsa korpusi i shtypit priste fillimin e ceremonisë.
Top Channel
