Bisedimet për paqe vazhdojnë, tensionet rriten/ Rusia kryen një tjetër sulm në qytetin ukrainas, raportohet për dy viktima 03/12 07:45
Presidenti amerikan Donald Trump deklaroi të martën se po shfuqizon të gjitha dokumentet, përfshirë faljet, që sipas tij ish-presidenti Joe Biden ka nënshkruar me autopen — një pajisje që riprodhon automatikisht nënshkrimin.
Veprimi i Trump përbën një precedent të pazakontë dhe, sipas ekspertëve ligjorë, nuk ka bazë juridike.
Autopeni është përdorur prej dekadash nga presidentë të të dy partive, kryesisht për dokumente ceremoniale ose me volum të lartë.
Juristët theksojnë se Kushtetuta nuk kërkon nënshkrim fizik të presidentit për ta bërë një dokument, përfshirë faljet, të vlefshëm. Për më tepër, ligji federal nuk parashikon asnjë mekanizëm që i lejon një presidenti të anulojë faljet e paraardhësit.
Megjithatë, Trump pretendoi në Truth Social se çdo dokument i nënshkruar nga Biden me autopen është “plotësisht i pavlefshëm”, duke u bërë thirrje marrësve të faljeve dhe aktit të shkurtimeve të dënimeve të konsiderojnë dokumentet si “të terminura”.
Sipas Fox News, veprimi i Trump nuk ndikon faljen e Hunter Biden, pasi ajo është nënshkruar me stilolaps. Media amerikane spekulon se vendimi mund të synojë figura të tilla si Dr. Anthony Fauci.
Gjatë largimit nga detyra, Biden dha disa falje, përfshirë anëtarë të familjes, si dhe komutim dënimesh për të dënuar për drogë jo të dhunshme. Ai gjithashtu fali figura të njohura politike, si:
Gjeneralin në pension Mark Milley;
Anëtarë të Komitetit që hetoi sulmin e 6 janarit;
Ish-kongresmenët Liz Cheney dhe Adam Kinzinger.
Trump ka kritikuar vazhdimisht përdorimin e autopenit nga Biden, duke e përdorur çështjen për të vënë në pikëpyetje kapacitetin mendor dhe rolin e tij real në marrjen e vendimeve. Biden dhe ish-stafi i tij kanë mohuar akuzat, duke theksuar se presidenti ka qenë aktiv në nënshkrimin dhe miratimin e dokumenteve.
Në fakt, përdorimi i pajisjeve mekanike për kopjimin e nënshkrimeve daton që nga koha e Thomas Jefferson. Departamenti i Drejtësisë nën administratën e George W. Bush ka konfirmuar më parë se autopeni ka të njëjtën fuqi ligjore si nënshkrimi i presidentit, madje edhe për ligjet.
Ekspertët e së drejtës kushtetuese theksojnë se as Kushtetuta nuk kërkon që faljet të jenë të shkruara, e aq më pak të nënshkruara, duke e bërë përpjekjen e Trump për t’i rrëzuar ato juridikisht edhe më të brishtë.
Lëvizja e Trump shihet si një tjetër përpjekje për të sfiduar precedentët ligjorë, duke e lënë sistemin gjyqësor të merret me pasojat. Autopeni nuk është vënë kurrë më parë nën një sfidë serioze ligjore — deri tani.
Top Channel
