Takimi Witkoff-Putin, presidenti ukrainas: Kurrë s’ka pasur mundësi më të mirë për ta ndalur luftën 02/12 18:33
Presidenti venezuelian Nicolás Maduro ka miratuar një fluturim për riatdhesimin e emigrantëve nga Shtetet e Bashkuara, njoftuan autoritetet venezueliane.
Sipas ‘Reuters’, ky vendim vjen disa ditë pasi Karakasi tha se komentet e presidentit të SHBA-së, Donald Trump, kishin penguar praktikisht programin e fluturimeve.
“Autoriteti Aeronautik i Venezuelës ka marrë një kërkesë nga qeveria e Shteteve të Bashkuara për të rinisur fluturimet e riatdhesimit të migrantëve nga ky vend në Venezuelë“, tha Ministria e Transportit në një deklaratë të martën në mëngjes.
Një fluturim i Eastern Airlines nga Phoenix është autorizar të ulet në Maiquetia, afër Karakasit, shtoi ministria.
Fluturimet e riatdhesimit, të cilat ndodhnin dy herë në javë, ishin pezulluar pasi qeveria venezueliane tha se komentet e Trump, sipas të cilave hapësira ajrore e Venezuelës duhej të konsiderohej e mbyllur, përbënin një ndalesë të njëanshme për fluturimet. Ky deklarim ishte pjesë e breshërit të fundit të Trump në rritjen e tensioneve mes dy shteteve.
Komentet e presidentit Trump të shtunën, në të cilat tha se hapësira ajrore mbi dhe përreth Venezuelës duhet të konsiderohet “e mbyllur në tërësi”, shkaktuan pasiguri dhe konfuzion në Karakas, ndërsa administrata e tij vazhdon të shtojë presion mbi qeverinë e Maduro.
Qeveria venezueliane ka thënë më parë se rreth 14,000 venezuelianë janë riatdhesuar nga SHBA gjatë periudhës shkurt-nëntor, falë fluturimeve të organizuara për t’i kthyer ata në shtëpi, përkundër masave të ashpra të administratës Trump kundër imigracionit.
Top Channel
