Zjarri vdekjeprurës në Hong Kong/ Shkon në 151 numri i viktimave, 13 të arrestuar 01/12 17:30
Mbretëria e Bashkuar dhe SHBA-ja kanë rënë dakord për një marrëveshje për të mbajtur në zero tarifat mbi importet farmaceutike të Mbretërisë së Bashkuar në Amerikë.
Sipas marrëveshjes, Mbretëria e Bashkuar do të paguajë më shumë për ilaçet përmes Shërbimit Shëndetësor Kombëtar (NHS) në këmbim të një garancie që taksat e importit mbi produktet farmaceutike do të mbeten zero për tre vjet.
Marrëveshja vjen pasi Presidenti amerikan Donald Trump kërcënoi t’i rriste tarifat deri në 100% për importet e barnave të markave të njohura.
Produktet farmaceutike janë një nga eksportet më të mëdha të Mbretërisë së Bashkuar drejt SHBA-së, e cila është gjithashtu tregu më i madh për prodhuesit britanikë të barnave, përfshirë GSK dhe AstraZeneca.
Në fillim të vitit, Presidenti Trump njoftoi rritje të mëdha të taksave mbi mallrat e importuara, të cilat ai argumentoi se do të krijonin vende pune dhe do të nxisnin prodhimin amerikan.
Në qershor, Trump nënshkroi një marrëveshje me Mbretërinë e Bashkuar për të hequr disa barriera tregtare midis dy vendeve dhe për të ulur tarifat për shumicën e mallrave të eksportuara në SHBA në 10%. Por produktet farmaceutike mbetën ende një pikë e paqartë.
Trump ka argumentuar se konsumatorët amerikanë në thelb subvencionojnë mjekimet për vendet e tjera të zhvilluara duke paguar çmime shumë më të larta.
Sekretari amerikan i Shëndetësisë, Robert Kennedy Jr., tha se amerikanët “nuk duhet të paguajnë çmimet më të larta të ilaçeve në botë për barnat të cilat ata kanë ndihmuar t’i financojnë”.
“Kjo marrëveshje me Mbretërinë e Bashkuar forcon mjedisin global për ilaçe inovative dhe sjell balancën e shumëpritur në tregtinë farmaceutike SHBA–MB,” tha ai në një deklaratë.
Në 12 muajt deri në fund të shtatorit, Mbretëria e Bashkuar eksportoi ilaçe me vlerë 11.1 miliardë paund në SHBA, duke përbërë 17.4% të të gjitha eksporteve të mallrave gjatë asaj periudhe, sipas Departamentit për Biznes dhe Tregti.
Marrëveshja parashikon që Mbretëria e Bashkuar të rrisë pragun e çmimit me 25%, mbi të cilin trajtimet e reja konsiderohen tepër të shtrenjta.
Gjithashtu, Mbretëria e Bashkuar do të rrisë shumën totale që NHS shpenzon për ilaçe, duke synuar ta dyfishojë këtë shpenzim nga 0.3% e PBB-së në 0.6% të PBB-së gjatë 10 viteve të ardhshme.
Shuma që kompanitë farmaceutike duhet t’i kthejnë NHS-së, në mënyrë që sistemi shëndetësor të mos e tejkalojë buxhetin e tij, do të kufizohet në 15%. Vitin e kaluar, kompanive iu desh të kthenin më shumë se 20%. Në këmbim, eksportet e barnave të Mbretërisë së Bashkuar do të mbrohen nga rritja e tarifave për tre vitet e ardhshme.
Top Channel
