Manchester United dhe Liverpool ngrenë kokë në ndeshjet e radhës së Premier League duke fituar sfidat e tyre respektive. Skuadra e Djajve të Kuq, iu imponua Crystal Palace në Londër duke e mundur me rezultatin 2-1.
Rezultati u zhbllokua në minutën e 33 me anë të një 11 metërshi në favor të Crystal Palace. Mateta u tregua i saktë nga pika e bardhë dhe skuadra londineze mori avantazhin 1-0. Manchester United u duk se do të vuante përsëri, por skuadra e Amorin u zgjua dhe arriti të barazojë rezultatin me Zirkzee pas një asisti të Bruno Fernandes. Portugezi më pas shërbeu edhe për Mount që shënoi golin që i dha avantazhin Manchester United në 2-1 me portugezin që bëhet futbollisti i 4 me më shumë asiste në historinë e Djajve të Kuq, me 56 pas Giggs, Rooney dhe Beckham. Me këtë fitore, Manchester United shkon në 21 pikë duke parakaluar pikërisht Crystal Palace që mbetet me 20 pikë
Kthehet të buzëqeshë edhe Liverpool që ashtu sikurse Manchester United mori një fitore në transfertë ndaj West Ham me rezultatin 2-0. Në London Stadium, ndeshja u zgjidh në pjesën e dytë pasi e para u mbyll me barazimin 0-0. Në minutën e 60, Liverpool zhbllokoi rezultatin me golin e Isak që shfrytëzoi në maksimum një asist të Gakpo. West Ham në minutën e 84 mbeti me 10 futbollistë pas ndëshkimit me karton të kuq të Paqueta, ndërsa në minutat shtesë Gakpo mbylli përfundimisht llogaritë e ndeshjes duke shënuar golin e dytë për Liverpool që e mbylli ndeshjen 2-0 duke marrë këtë fitore që e con në kuotën e 21 pikëve, po aq sa edhe manchester United, ndërsa West Ham mbetet me 11 pikë
Top Channel
