Nuk ka fitues në derbin londinez mes Chelseat dhe Arsenalit, ndeshja ku ishte e përqendruar e gjithë vëmendja duke parë edhe formën që po kalojnë në këtë pjesë të sezonit të dyja skuadrat.
Në Stamford Bridge, 90 minutëshi i këtij derbi përfundoi me barazimin 1-1 në një sfidë të cilën Chelsea për 52 minuta ishte në inferioritet numerik. Pjesa e parë e kësaj superpërballje u mbyll 0-0, por momenti për t’u shënuar është pikërisht minuta e 38 kur Caicedo u ndëshkua me karton të kuq për një faull të shkaktuar ndaj një prej futbollistëve të Arsenalit.
Megjithatë Topcinjtë nuk përfituan menjëherë nga kjo situatë dhe kështu që skuadrat shkuan në pushimin e ndeshjes me rrjeta të paprekura. Në fillimin e pjesës së dytë, Chelsea në mënyrë surprizë shënoi golin e avantazhit me Chalobah pas një asisti të Reece James.
Reagimi i Arsenalit ishte i menjëhershëm, me Topcinjtë që në minutën e 59 barazuan rezultatin me golin e Merinos. Në pjesën tjetër të ndeshjes, Arsenali tentoi të shënojë golin e fitores, por në fund ajo u mbyll 1-1 me skuadrën e Artetës që shkon në 30 pikë, 5 më shumë se Manchester City në vendin e dytë, ndërsa Chelsea është në vendin e tretë me 24 pikë.
Top Channel
