Premier League/ Manchester City fitore me zemër në dorë ndaj Leeds, Sunderland mposht Bournemouth 29/11 18:27
Në prag të ndeshjes së madhe midis Romës dhe Napolit, foli edhe Francesco Totti, i cili kishte luajtur në disa ndeshje të tilla të rëndësishme për Romën, gjithmonë duke mbajtur shiritin e kapitenit në krah.
Midis shumë kujtimeve të ish-kapitenit me fanellën e Verdhekuqëve, ka edhe disa ndeshje të rëndësishme kundër napolitanëve: “Kujtimet e mia për Roma-Napoli? Kryesorja lidhet me ndeshjen para asaj, në vitin kur fituam Scudetton në vitin 2001, Napoli-Roma, ndeshja e parafundit. Nëse do të kishim fituar, Napoli do të kishte përfunduar në Serie B. Ishte e paimagjinueshme për një klub si Napoli, karizma dhe pasioni i të cilit më kujtojnë shumë Romën.
Fati deshi që ne ta fitonim javën pasardhëse, në stadiumin tonë. Tifozët e Napolit janë të pabesueshëm, ata kanë një dobësi për mua. Ata gjithmonë kanë qenë me mua, përveç ndeshjeve kur isha kundërshtari i tyre si kapiten i Romës, që kur e lash futbollin, ata më kanë mbështetur në çdo mënyrë.”
Totti kujton gjithashtu një nga legjendat që formësoi historinë e futbollit të qytetit të Napolit: “Pata fatin të takoja Maradonën, të flisja me të dhe të haja me të. Një person i jashtëzakonshëm, ky është futbolli për mua. Një frazë që më tha? Ai gjithmonë më thoshte se për të unë isha lojtari më i madh italian i të gjitha kohërave, kjo frazë më ka mbetur në mendje.”
Nesër në stadiumin Olimpico do të zhvillohet një ndeshje e nivelit të lartë, një natë që Verdhekuqt nuk e kanë përjetuar prej vitesh duke parë se në çfarë pozicioni janë në klasifikim aktualisht: “Më mungon shumë Olimpico, shpesh vrapoj përreth tij, për të mos më njohur, shkoj herët në mëngjes ose në mbrëmje në errësirë, vendos një kapele, bluzë me kapuç, pasi jetoj afër. Nuk kam qenë për të parë Romën në stadium për gati tre vjet, më mungon, por tani planifikoj të kthehem .”
Top Channel
