3-vjeçari mahnit mjekët pas terapisë së parë gjenetike në botë për sindromën vdekjeprurëse 24/11 08:51
SHBA-ja dhe Ukraina kanë njoftuar përparim domethënës drejt një kornize të përditësuar të planit të paqes, pas raundeve intensive të bisedimeve në Gjenevë, ndërkohë që Rusia vazhdon sulmet me raketa dhe dronë mbi territorin ukrainas.
Sekretari amerikan i Shtetit, Marco Rubio, deklaroi se diskutimet kanë qenë “shumë produktive” dhe se ekipet negociuese kanë ngushtuar ndjeshëm dallimet rreth planit 28-pikësh të mbështetur nga SHBA-ja.
Rubio tha se palët kanë bërë “një sasi të jashtëzakonshme përparimi” në rafinimin e draftit të ri, ndërsa presidenti ukrainas Volodymyr Zelensky përmendi “sinjale pozitive” nga ekipi i Presidentit Donald Trump.
Megjithatë, Rubio paralajmëroi se marrëveshja përfundimtare duhet të miratohet nga presidentët e të dyja vendeve përpara se t’i paraqitet Rusisë.
Deklaratat e së dielës erdhën pak orë pasi Trump kritikoi udhëheqjen ukrainase për “zero mirënjohje” ndaj përpjekjeve të SHBA-së për t’i dhënë fund konfliktit, duke theksuar gjithashtu blerjen e vazhdueshme të naftës ruse nga vendet evropiane.
Edhe pse plani nuk është publikuar zyrtarisht, detaje të rrjedhura tregojnë disa pika jashtëzakonisht kontroverse:
-Tërheqja e trupave ukrainase nga pjesë të Donetskut që aktualisht kontrollohen prej Kievit.
-Njohja ndërkombëtare e kontrollit de facto rus në Donetsk, Luhansk dhe Krime.
-Ngrirja e linjave të frontit në Kherson dhe Zaporizhzhia.
-Kufizimi i ushtrisë ukrainase në 600,000 trupa (nga rreth 880,000 aktualisht).
-Heqja dorë nga aspiratat për anëtarësim në NATO, duke i zëvendësuar me “garanci sigurie” të papërcaktuara.
-Heqja e sanksioneve ndaj Rusisë dhe rikthimi i saj i mundshëm në formatin G8.
Drafti përfshin gjithashtu pritjen që Rusia të ndalojë agresionin ndaj fqinjëve të saj dhe që NATO të mos zgjerohet më tej.
Top Channel
