Kris Boyd, lojtar i ekipit të futbollit amerikan New York Jets, është në gjendje kritike pasi u qëllua me armë zjarri në orët e para të së dielës në Manhatan, raportojnë mediat amerikane.
Policia e New York-ut njoftoi për CBS News se viktima, një 29-vjeçar, u qëllua në zonën e barkut dhe u transportua me urgjencë në spital. Ndërsa autoritetet nuk e publikuan emrin, klubi New York Jets konfirmoi për BBC-në se bëhet fjalë për Boyd.
Sipas policisë, ngjarja ndodhi rreth orës 02:00 të mëngjesit me orën lokale, jashtë restorantit luksoz Sei Less në Midtown Manhattan, pas një telefonate në 911 që raportonte të shtëna me armë. Hetimet vijojnë dhe deri tani nuk ka asnjë person të arrestuar, konfirmoi NYPD.
Në një deklaratë të shkurtër, Jets thanë: “Jemi në dijeni të situatës që përfshin Kris Boyd dhe për momentin nuk kemi koment të mëtejshëm.”
Boyd iu bashkua Jets këtë vit, pas dy sezoneve me Houston Texans, një sezoni me Arizona Cardinals dhe katër të tjerë me Minnesota Vikings. Ai aktualisht ndodhej në listën e të dëmtuarve, pasi kishte pësuar një dëmtim në shpatull gjatë stërvitjeve në gusht.
Lojtarët dhe tifozët kanë reaguar menjëherë në rrjetet sociale. Shoku i skuadrës, Jermaine Johnson, publikoi në X një lutje për shërimin e Boyd: “Zot, vendose dorën tënde shëruese mbi Kris dhe udhëhiqe drejt shëndetit dhe sigurisë…”
Reagime të shumta kanë ardhur edhe nga tifozë që shprehin mbështetje dhe urojnë për rikuperimin e tij sa më të shpejtë.
Top Channel
