Nga Endi Tufa
Shqipëria sot zbret në fushë përballë Anglisë në ndeshjen e fundit të eliminatoreve, në një duel që prej dekadash është shndërruar në sinonimin e një muri të pakalueshëm. E vërteta statistikore është e ftohtë: në 7 ndeshje kundër Anglisë, Shqipëria nuk ka marrë asnjë pikë. Sipas të dhënave historike, të mbledhura nga arkivat ndërkombëtare, bilanci është brutal: 7 humbje, 0 barazime, 0 fitore, 14 gola të pësuar, vetëm 1 gol i shënuar ndonjëherë.
Nëse historia do të ishte një gjykatës i vetëm, atëherë Shqipëria do të hynte sot në fushë me një dëm të paracaktuar. Por futbolli nuk është kurrë vetëm histori. Megjithatë, le t’i shohim faktet.
Anglia nuk ka pësuar asnjë gol në këto eliminatore. Një skuadër që ka ndërtuar një mur të hekurt, që mban në shifër zero të gjitha përpjekjet e kundërshtarëve për të depërtuar. Kjo e kthen Shqipërinë, në letër, në skuadrën me probabilitetin më të ulët të mundshëm për të shënuar, e aq më pak për të marrë pikë. Modelet analitike dhe tregjet e statistikave sportive e japin Anglinë favorite me rreth 67% shanse për fitore, Shqipërinë vetëm me 14%, ndërsa barazimi lëviz rreth 19%.
Në përballjen e fundit direkte, në mars, Anglia fitoi sërish pa pësuar gol. Dhe në të gjitha ndeshjet historike, Shqipëria ka hasur një barrierë psikologjike po aq të madhe sa ajo sportive: ndjesinë se Anglia është një emër që nuk thyhet.
Por sot realiteti është ndryshe. Shqipëria nuk është më skuadra që ka qenë në vitet ’90 apo 2000. Këta kuqezinj, edhe pse statistikisht nën autostradën e gjigantëve, kanë treguar se dinë të thyejnë zinxhirë të vjetër. Kanë fituar në Beograd, kanë marrë pikë historike në Europian, kanë mundur kundërshtarë që dikur as nuk imagjinohej t’i prekeshim.
Pyetja e vërtetë nuk është nëse mundemi me Anglinë, por nëse sot është dita kur historia nga 0-7 kthehet në 1-0.
Sepse futbolli nuk është një libër me kapituj të shkruar paraprakisht. Statistikat janë vetëm realiteti i djeshëm—e sot fusha mund t’i mohojë. Anglia s’ka pësuar gol në eliminatore? Shumë mirë. Diku, dikush do t’ia shënojë të parin. Pse jo Shqipëria?
Tabutë nuk thyhen me numra.
Tabutë thyhen me një moment. Me një goditje. Me një guxim që nuk pyet për probabilitete.
Sonte, Shqipëria nuk hyn në fushë për të sfiduar Anglinë. Hyn për të sfiduar statistikën më të zymtë në historinë tonë moderne. Dhe çdo tabu, sado e fortë të jetë, ka një çast të vetëm kur fillon të çahet.
Ndoshta ky është çasti ynë.
Top Channel
