Studimi: Një gjen miqësor ndaj zemrës ndihmon të riparohet pas një ataku kardiak

Testet laboratorike në qelizat njerëzore tregojnë se gjeni i quajtur CCNA2 mund të riaktivizohet, duke çuar në rigjenerimin e indeve të dëmtuara të zemrës. Kjo është sipas një studimi të udhëhequr nga Hina Chaudhry nga Shkolla e Mjekësisë Icahn në Mount Sinai, i botuar në NPJ Regenerative Medicine, i cili hap mundësi të reja për terapi të mundshme për riparimin e dëmtimeve kardiake.
Gjetjet e reja ndjekin përparimet e mëparshme të të njëjtit grup kërkimor në vitin 2014 mbi rigjenerimin qelizor të indeve të zemrës së derrit. Chaudhry shpjegon: “Tani e kemi avancuar këtë fushë duke demonstruar se edhe qelizat e zemrës njerëzore të moshës së mesme, të cilat prej kohësh mendoheshin të paafta për t’u ndarë, mund të induktohen për të prodhuar qeliza të reja funksionale.”
Puna u përqendrua në gjenin CCNA2, i njohur për rolin kyç në ndarjen qelizore të kardiomiociteve – qelizat që përbëjnë muskulin e zemrës – gjatë zhvillimit në mitër, por që më pas çaktivizohet pas lindjes. Studiuesit synuan të riaktivizonin gjenin dhe të verifikonin nëse ai mund të çonte në gjenerimin e qelizave të reja të afta për të zëvendësuar ato të dëmtuara pas një ataku kardiak ose pamjaftueshmërie kardiake. Për ta realizuar këtë, ata inokuluan gjenin aktiv nëpërmjet një vektori viral në qelizat e muskulit kardiak të njeriut të kultivuara in vitro dhe vëzhguan replikimin e tyre.

“Ne ishim pionierë të idesë se zemra mund të rigjenerohej duke rizgjuar gjenet e fjetura të ndarjes qelizore, dhe tani e kemi sjellë këtë vizion një hap më afër pacientëve,” tha Chaudhry. Ai shtoi: “Qëllimi ynë është të ofrojmë një terapi që i lejon zemrës të shërohet vetë pas një ataku në zemër ose pamjaftueshmërie kardiake, duke zvogëluar nevojën për transplante ose pajisje mekanike.”

Hapi tjetër, sipas autorëve, është marrja e miratimit nga Administrata Amerikane e Ushqimit dhe Barnave (FDA) dhe fillimi i provave klinike të terapisë CCNA2 te pacientët me sëmundje të zemrës.

Top Channel