OpenAI marrëveshje 38 miliardë dollarëshe me Amazon për akses në cloud 03/11 22:58
Sekretari i Mbrojtjes i SHBA-së, Pete Hegseth, vizitoi zonën e demilitarizuar në kufirin midis Koresë së Veriut dhe asaj të Jugut më 3 nëntor, vizita e parë e një sekretari të mbrojtjes të SHBA-së në rajon në tetë vite.
Ministri i Mbrojtjes i Koresë së Jugut, Ahn Kyu-bak, shoqëroi homologun e tij amerikan në Panmunjom, vendi i vetëm ku ushtarët e Koresë së Jugut dhe të Koresë së Veriut përballen me njëri-tjetrin.
Të dy ministrat “riafirmuan forcën e pozicionit të tyre të përbashkët mbrojtës dhe bashkëpunimin e ngushtë midis Koresë së Jugut dhe Shteteve të Bashkuara”, tha Ministria e Mbrojtjes e Koresë së Jugut në një deklaratë.
Ahn dhe Hegseth janë planifikuar të diskutojnë gatishmërinë mbrojtëse kundër Koresë së Veriut dhe bashkëpunimin Uashington-Seul mbi sigurinë rajonale dhe mbrojtjen kibernetike, tha ministria.
Në të njëjtën kohë, ata pritet të përmendin planet dypalëshe për të adresuar “mjedisin e sigurisë në ndryshim dhe kërcënimet” duke forcuar lidhjet midis dy vendeve.
Uashingtoni po shqyrton mundësinë e bërjes më fleksibël të rolit të 28,500 trupave amerikane të stacionuara në Korenë e Jugut, me qëllim ruajtjen e ekuilibrit të fuqisë në Azi mes shqetësimeve rreth veprimeve kineze në Detin e Kinës Jugore dhe rreth Tajvanit.
Zyrtarët amerikanë kanë treguar se ekziston një plan për t’i bërë forcat amerikane më fleksibile në mënyrë që ato të mund të veprojnë potencialisht jashtë gadishullit Korean, duke iu përgjigjur një game më të gjerë kërcënimesh, siç është mbrojtja e Tajvanit dhe kontrollimi i ndikimit ushtarak në rritje të Kinës.
Vizita e Hegseth vjen pas turneut të Presidentit të SHBA-së Donald Trump në Azi javën e kaluar, gjatë të cilit republikani përsëriti se “do të donte” të takohej me udhëheqësin e Koresë së Veriut Kim Jong Un.
Trump u takua me Kim në qershor 2019 në Panmunjom, gjatë mandatit të tij të parë në Shtëpinë e Bardhë. Në atë kohë, Trump u bë presidenti i parë në detyrë i SHBA-së që shkeli në Korenë e Veriut, duke kaluar shkurtimisht kufirin përpara se të kthehej në zonën e demilitarizuar.
Para këtij takimi, Sekretari i atëhershëm i Mbrojtjes i SHBA-së, James Mattis, kishte vizituar zonën e demilitarizuar në tetor 2017.
Top Channel
