Krizë financiare në stol/ Shkarkimi i Tudor i kushton rëndë Juventusit, tre trajnerët me kosto më të ulët 27/10 21:07
Nata e Madridit kishte lënë pas pak shpresë për Juventusin, por mbrëmja në Romë u shndërrua në një film horror për bardhezinjtë.
Igor Tudor kishte planifikuar një dyshe të fuqishme në sulm me Vlahovic dhe David – dhe më pas, gjatë ndeshjes, shtoi edhe Yildiz – por rezultati ishte i njëjtë si në javët e fundit: mungesë totale efikasiteti dhe ideje.
Në pjesën e parë, Dusan Vlahovic pati mundësinë e artë për të ndryshuar rrjedhën e ndeshjes, por dështoi përballë Provedel. Në anën tjetër, një gabim i Davidit ndihmoi Lazion të gjente rrugën drejt golit. As ndryshimet e Tudor-it nuk sollën rezultat: Openda u aktivizua vonë dhe nuk arriti të ndikojë, ndërsa Yildiz, megjithëse u përpoq, u duk i lodhur dhe i paqartë në fushë.
Statistikat janë alarmante: Juventusi nuk ka shënuar në katër ndeshje radhazi – kundër Milanit, Comos, Real Madridit dhe Lazios – një rekord negativ që nuk ndodhte që nga marsi 1991, në epokën e Maifredit. Bardhezinjtë duken pa identitet, pa ide dhe me një krizë të thellë në fazën sulmuese.
Pas disfatës në “Olimpico”, drejtuesit e Juventusit nuk pritën më. Në një mbledhje urgjente në Continassa, nën praninë e John Elkann, klubi mori vendimin për të shkarkuar Igor Tudor-in nga detyra e trajnerit.
“Juventus falënderon Igor Tudor për përkushtimin dhe profesionalizmin e treguar gjatë këtyre muajve dhe i uron suksese në karrierën e tij të ardhshme,” – thuhet në njoftimin zyrtar të klubit.
Në sulm, problemi mbetet i thellë: Vlahovic ka humbur formën që e kishte bërë lider, Jonathan David nuk ka arritur të përshtatet me sistemin, ndërsa Openda dhe Yildiz nuk po gjejnë hapësirën e duhur.
Pa gola, pa ide dhe me renditjen që po rrëshqet jashtë kontrollit, Juventus hap tani një faqe të re. Në horizont, drejtuesit po përgatisin ardhjen e Thiago Motta-s, trajnerit që shihet si njeriu i duhur për të ringjallur një skuadër që ka humbur identitetin dhe besimin.
Top Channel
