Starmer vihet në lëvizje pas sanksioneve të Trump ndaj Rusisë, i bën thirrje europianëve të rrisin mbështetjen për Ukrainën

Takimi është planifikuar të zhvillohet pasdite, një ditë pas një samiti të BE-së në Bruksel, në të cilin mori pjesë edhe presidenti ukrainas.

Në kryeqytetin britanik pritet të jenë gjithashtu kryeministrja daneze Mette Frederiksen, kryeministri holandez Dick Schoff dhe Sekretari i Përgjithshëm i NATO-s Mark Rutte, sipas një njoftimi për shtyp nga shërbimet e Starmer.

Njëzet udhëheqës të tjerë midis tyre Presidenti francez Emmanuel Macron pritet të marrin pjesë në bisedime përmes lidhjes me video, tha Downing Street.

Kjo aleancë e të gatshmëve përfshin 26 vende, kryesisht europiane. Ajo bashkëkryesohet nga Starmer dhe Macron.

“Kryeministri pritet t’u bëjë thirrje udhëheqësve që ta vendosin Ukrainën në pozicionin më të fortë të mundshëm ndërsa afrohet dimri”, tha zyra e tij në një deklaratë.

Përveç forcimit të sanksioneve mbi hidrokarburet ruse, Starmer do t’u bëjë thirrje partnerëve të tij që “të përfundojnë punën e përdorimit të burimeve ruse për të liruar miliarda për të financuar mbrojtjen ukrainase dhe për të rritur donacionet e sistemeve me rreze të gjatë veprimi”.

Europianët tashmë furnizojnë forcat e armatosura ukrainase me raketa me rreze të gjatë veprimi, veçanërisht SCALP francez dhe Storm Shadow britanik, por në sasi të vogla.

Ukraina, e cila prodhon gjithashtu disa raketa të këtij lloji (Neptune, Flamingo), në vend të kësaj ka kërkuar vazhdimisht, pa sukses, raketa gjermane Taurus. Ndërsa SHBA-të deri më tani kanë refuzuar të dorëzojnë raketa Tomahawk, siç kishte shpresuar Zelensky.

Starmer pritet gjithashtu të njoftojë një “përshpejtim” të programit britanik për të prodhuar 5,000 raketa të destinuara për mbrojtjen e Ukrainës.

Top Channel