Polemika në Greqi për ndalimin e protestave pranë monumentit të Ushtarit të Panjohur 24/10 20:24
Autoritetet franceze po analizojnë më shumë se 150 mostra ADN-je, gjurmë gishtash dhe gjurmë të tjera të gjetura në mjetet dhe pajisjet e sigurisë që grabitësit lanë pas, pas vjedhjes spektakolare të bizhuterive të paçmuara nga Muzeu i Luvrit në Paris.
Pesë ditë pas grabitjes që tronditi Francën, prokurorja e Parisit, Laure Becchio, deklaroi se ka “pak shpresë” që bizhuteritë të rikuperohen, por u shpreh “optimiste” për progresin e hetimeve, sipas The Guardian. Ajo tha për gazetën Ouest-France se “në 24 orët e ardhshme mund të kemi rezultate që do të na japin të dhëna të rëndësishme, veçanërisht nëse autorët kanë precedentë penalë”.
Si ndodhi grabitja
Banda mbërriti në Luvër në orën 09:30 të mëngjesit të së dielës, pak pasi muzeu u hap, duke përdorur një kamion transporti të vjedhur me një ashensor 30 metra. Dy nga autorët u ngjitën në katin e parë, në Galerinë e famshme Apollo, ku ekspozohen xhevahiret e mbetura të kurorës franceze. Të veshur me jelekë fluoreshentë për t’u paraqitur si punëtorë, ata thyen një dritare të pambrojtur dhe përdorën rrota prerëse për të hapur dy vitrina, përpara se të largoheshin me motoçikleta të drejtuara nga bashkëpunëtorët e tyre.
Në përpjekjen për të djegur kamionin, grabitësit dështuan dhe braktisën helmetat, rrotat, disqet prerëse, një jelek dhe sende të tjera në vendngjarje. Këto prova po analizohen në laboratorët mjeko-ligjorë në Paris dhe në rajonin përreth.
Në të njëjtën kohë, autoritetet po shqyrtojnë pamjet e kamerave të sigurisë, kornizë pas kornize, përfshirë ato publike, private dhe të autostradave, me synimin për të rindërtuar rrugën e arratisjes së autorëve.
Hetimi dhe pistat
Më shumë se 100 oficerë policie, përfshirë ekspertë të Njësisë së Krimit të Organizuar (BRB) dhe specialistë në vjedhje arti, po marrin pjesë në hetim.
Sipas prokurores Becchio, po shqyrtohet edhe mundësia e përfshirjes së një personi nga brenda muzeut, pasi grabitja mbart “të gjitha karakteristikat e një operacioni të organizuar: përgatitje të kujdesshme, guxim, shënjestrim specifik dhe arratisje të planifikuar”.
Operacioni zgjati më pak se shtatë minuta, ndërsa dy grabitësit që hynë në sallë qëndruan vetëm tre minuta e 58 sekonda.
Gjatë arratisjes u rrëzua një kurorë e zbukuruar me diamante dhe smeralde, por autorët arritën të merrnin tetë bizhuteri të shekullit XIX.
Rasti ka tërhequr vëmendjen edhe për ngjashmërinë me një histori në serinë e librave për fëmijë “Fantomette”, botuar në vitet 1960, që përshkruan aventurat e një superheroine 12-vjeçare.
Sipas ekspertëve, bizhuteritë janë tepër të njohura për t’u shitur në tregjet e zeza dhe ndoshta do të shkatërrohen. Becchio theksoi se “koha është kritike”, duke shtuar se, me publicitetin ndërkombëtar që rrethon rastin, “autorët mund të hezitojnë të largohen shumë, dhe nëse veprojmë me shpejtësi, mund të arrijmë t’i rimarrim bizhuteritë”.
Dështimi i sigurisë
Sipas gazetës Le Parisien, pamjet e sigurisë tregojnë se grabitësit patën vështirësi në hapjen e vitrinave dhe në fund thyen pjesë të vogla xhami për të nxjerrë bizhuteritë.
Alarmi u aktivizua në orën 09:34, ndërsa dy roje nxituan në vendngjarje, por u tërhoqën, ndoshta duke menduar se grabitësit ishin të armatosur.
Drejtori i muzeut, Laurence de Carr, pranoi një “dështim serioz të sigurisë”, duke theksuar para Senatit francez se muret e jashtme të muzeut nuk ishin të mbuluara mjaftueshëm nga kamerat.
Top Channel
