994 mijë shqiptarë udhëtuan jashtë, INSTAT: Shifrat janë 10% më të larta se një vit më parë

Në muajin gusht, 994.573 persona dolën nga Shqipëria, duke shënuar një rritje me 10.3% krahasuar me të njëjtën periudhë të një viti më parë. Arsyet janë nga më të ndryshmet. Por përzgjedhja kryesore e destinacioneve për pushime ishin dy: Greqia dhe Turqia.

Operatorja turistik, Fiori Zani thotë: “Shqiptarët, në radhë të parë, shkojnë jashtë sepse Shqipërinë e kanë vizituar dhe kanë kuriozitet. Në radhë të dytë, besoj se linjat low cost i favorizojnë që t’i bëjnë pushimet jashtë, duke i rezervuar në avancë, patjetër që të kapin një çmim më të mirë. Greqia dhe Turqia janë destinacionet kryesore që vizitojnë shqiptarët gjatë verës. Greqia për shkak të afërsisë dhe të gjitha llojeve të akomodimeve që ofron, që nga apartamentet deri te hotelet luksoze me shërbimin all inclusive. Turqia është facilitet për familjarët sepse çdo gjë është e organizuar dhe e di sa do të shpenzosh pa u nisur. Pastaj, patjetër, Spanja ka qenë një destinacion mjaft i kërkuar këtë vit, por jo vetëm, edhe jugu i Francës dhe patjetër Italia, Sicilia, kanë pasur shumë kërkesa.”

Gjatë sezonit veror ka pasur shumë diskutime në lidhje me kostot e pushimeve në Shqipëri, ku jugu i vendit konsiderohet dhe si më i shtrenjti. Por, sipas operatorëve turistikë, një situatë e tillë paraqitet edhe në Europë, ku në destinacionet më të kërkuara, standardi i çmimeve është më i lartë.

“Edhe po të ikësh në destinacionet që janë të bukura si Sardenja, Santorini, patjetër që çmimet janë shumë më të larta se jugu i Shqipërisë. Çmimet janë rritur kudo, edhe Greqia pati ulje të turistëve rreth 30%, kjo edhe për shkak të uljes së euros dhe rritjes së çmimeve, ndikoi kudo, jo vetëm në Shqipëri”, shton Zani.

Sa u përket ditëve të qëndrimit, pushimet e shqiptarëve jashtë nuk kanë zgjatur më shumë se 7 ditë, ndërsa kostoja e harxhimeve është llogaritur të jetë minimalisht 500 euro për person.

Top Channel