Afati për rivendosjen e sanksioneve po afron, Evropa kritikon Iranin për “vonesa” 24/09 13:04
Presidenti francez, Emmanuel Macron njoftoi se do të takohet sot me homologun e tij iranian, Massoud Pezeshkian, për të diskutuar çështjen e mprehtë të programit bërthamor të Teheranit.
“Orët e ardhshme do të jenë vendimtare. Ose Irani bën një gjest të vullnetit të mirë dhe ndjek rrugën e paqes dhe stabilitetit, duke i lejuar Agjencisë Ndërkombëtare të Energjisë Atomike (IAEA) të bëjë punën e saj, ose sanksionet do të rivendosen”, paralajmëroi presidenti francez.
Dje, ministrat e jashtëm të Francës, Britanisë dhe Gjermanisë (tre fuqitë evropiane që përbëjnë të ashtuquajturin grup E3), kreu i diplomacisë evropiane dhe homologu i tyre iranian u takuan në Asamblenë 3 Përgjithshme të OKB-së dhe ranë dakord të vazhdojnë bisedimet e tyre mbi programin bërthamor kontrovers të Teheranit, me qëllim që të arrijnë, në minutën e fundit, një marrëveshje për të shmangur rivendosjen e sanksioneve që ishin miratuar nga OKB.
Më 28 gusht, E3 akuzoi Iranin për mosrespektim të marrëveshjes së vitit 2015 për programin e tij bërthamor dhe aktivizoi klauzolën “snapback” që i lejon atij të rivendosë sanksionet brenda 30 ditëve, domethënë më 27 shtator.
Irani mbron të drejtën e tij sovrane për të pasur një program bërthamor për qëllime civile, veçanërisht për prodhimin e energjisë, ndërsa mohon kategorikisht se kërkon të zhvillojë armë bërthamore.
Shefi i IAEA-së, Rafael Grossi, njoftoi se një ekip inspektorësh është duke shkuar në Iran, në rast se arrihet një marrëveshje.
Top Channel
