Pas muaj të tërë protestash të nxitura pikërisht nga indinjata ndaj korrupsionit dhe mosndëshkueshmërisë pas shembjes së strehës së stacionit hekurudhor në Novi Sad, Prokuroria e Lartë atje ngriti zyrtarisht aktakuzë kundër trembëdhjetë personave të lidhur me ngjarjen e rëndë, ku humbën jetën 16 vetë e një tjetër u plagos rëndë.
Në mesin e të akuzuarve është edhe ish-ministri i Ndërtimit, Goran Vesic.
Organi i akuzës i propozoi Gjykatës së Lartë në Novi Sad që të caktojë paraburgim për të akuzuarit, duke përmendur shqetësimin e madh publik që mund të cenojë zhvillimin e qetë dhe të drejtë të procesit gjyqësor, si dhe për shkak të rrezikut të përsëritjes së veprës penale.
Aktpadia përfshin ish-zyrtarë të Ministrisë së Ndërtimit, Transportit dhe Infrastrukturës, ish-drejtorë të kompanisë “Infrastruktura e Hekurudhave të Serbisë”, projektues të konstrukteve, inxhinierë përgjegjës për projektin e lejes së ndërtimit, mbikëqyrës të punimeve, si dhe persona që kishin në ngarkim kontrollin teknik dhe ekzekutimin e punimeve.
Sipas akuzës, përgjegjësit kanë lejuar përdorimin e objektit publik – ndërtesës së stacionit hekurudhor në Novi Sad, krahu B – edhe pse punimet e rindërtimit ishin ende në zhvillim dhe objekti nuk kishte marrë lejen e përdorimit.
Përveç kësaj, ata akuzohen për mosmirëmbajtjen e strukturës para rindërtimit dhe për parregullsi gjatë fazës së projektimit dhe ekzekutimit të punimeve.
Tragjedia u kthye në shkëndijën e protestave masive kundër qeverisë në mbarë Serbinë, me qindra mijëra qytetarë që kanë dalë nëpër rrugë gjatë 9 muajve të fundit me kërkesën që të vendoset përgjegjësia penale dhe politike për këtë ngjarje.
Top Channel
