Kevin Costner padit dubluesen Devin LaBella për pretendime të rreme për përdhunimi në xhirimet e “Horizon: An American Saga – Chapter 2”

Ekipi ligjor i Costner ka kërkuar rrëzimin e padisë së LaBella-s, duke pretenduar se versioni i saj i ngjarjeve ka ndryshuar në dëshminë e fundit. Sipas TMZ, në dëshminë e re, LaBella ka pranuar se koordinatori i dublantëve, Wade Allen, u takua me të para xhirimeve dhe ia shpjegoi skenën në fjalë.

Avokatët e Costner, i cili është regjisor, bashkëskenarist, producent dhe aktor kryesor në film, pretendojnë se këto prova të reja tregojnë qartë se akuzat e LaBella-s janë të pavërteta. Ata theksojnë se aktorja më parë kishte pranuar se kishte kuptuar elementët kryesorë të skenës, duke përfshirë një moment kur personazhi mashkull i ngre fustanin deri te gjunjët, ndërsa ajo ndodhej në një karrocë.

Kevin Costner accuses stuntwoman who sued of lying about her claims of 'unscripted rape scene' https://t.co/MYWmF9wndX

— Daily Mail Celebrity (@DailyMailCeleb) September 13, 2025

Avokati i LaBella-s, megjithatë, ka kundërshtuar këto pretendime, duke deklaruar: “Është shqetësuese të shohësh të pandehurit që vazhdojnë t’i tregojnë Devin-it se çfarë përvoje ka pasur në sheshxhirim. Ajo është betuar dhe ka paraqitur prova mbi të cilat mbështetet. Pretendimet e saj nuk kanë ndryshuar dhe nuk janë shtrembëruar që nga dita e parë kur raportoi incidentin në maj të vitit 2023.”

Në dokumentet më të fundit ligjore, të publikuara më 8 shtator, LaBella pretendon se kishte menstruacione gjatë ditës kur u xhirua skena dhe se të brendshmet e saj u ekspozuan pasi fustani i saj u gris “nga beli deri në ijë” nga aktori Roger Ivens. Ajo gjithashtu thotë se pavarësisht se më 1 maj 2023 kishte një koordinator intimiteti gjatë xhirimit të një skene të planifikuar përdhunimi, një ditë më vonë, një tjetër skenë e ngjashme u xhirua pa praninë e një koordinatori të tillë dhe pa pëlqimin e saj.

LaBella akuzon Ivens se gjatë xhirimit të kësaj skene i ka vendosur dorën pranë ose mbi gjinjtë dhe organet gjenitale, duke shtuar se është ndier e “bllokuar” dhe se trupi i tij i madh dhe muskuloz e ka “shkelur” gjatë skenës.

Marty Singer, avokati i Kevin Costner, ka reaguar duke thënë për Daily Mail: “Këto mund të jenë prova të reja, por janë thjesht të njëjtat histori të vjetra. Këto akuza nuk janë vetëm të pabaza, por edhe qesharake. Ka 12 dëshmitarë që konfirmojnë se pretendimet e LaBella-s janë të sajuara. Kevin Costner është i vendosur të mbrojë të vërtetën – dhe do të vazhdojmë ta bëjmë këtë.”

Top Channel