“A u qëllova nga një AR-15?”/ Postimi i frikshëm i Charlie Kirk bëhet realitet 11 vite më pas 11/09 19:05
Franca po hedh hapa drejt masash drastike përsa i takon rrjeteve sociale.
Një raport i Parlamentit të Francës për TikTok-un rekomandoi ndalimin e rrjeteve sociale për fëmijët nën moshën 15-vjeçare dhe vendosjen e një të ashtuquajturi “orari policor dixhital” për adoleshentët e moshës 15 deri në 18-vjeç, në përpjekje për ta frenuar ndikimin negativ mbi shëndetin e tyre.
“Një ndalim i tillë do të dërgonte një mesazh si për fëmijët, ashtu edhe për prindërit, se rrjetet sociale nuk janë të padëmshme para moshës 15-vjeçare. Në fakt, është e kundërta. Komisioni ka intervistuar familje viktimash, menaxherë të platformave sociale dhe influencerë për të analizuar algoritmin e TikTok-ut, një aplikacion jashtëzakonisht i popullarizuar mes të rinjve, i cili kopjohet edhe nga rrjete të tjera sociale”, shprehet Laure Miller, raportuese e komisionit parlamentar hetimor.
Komisioni në fjalë u ngrit pas proceseve ligjore kundër TikTok-ut në Francë në fund të vitit 2024, të nisura në vazhdën e një padie nga shtatë familje që akuzuan platformën se ekspozon fëmijët ndaj përmbajtjeve që mund t’i nxisin drejt vetëvrasjes. Prindërit thonë se për ta është e vështirë ta kontrollojnë një gjë të tillë. Një prej tyre e identifikuar vetëm si Geraldine, humbi vajzën e saj 18 vjeçare Penelope shkurtin e vitit 2024. Vajza, e cila kreu vetëvrasje kishte parë në TikTok video me përmbajtje që nxisnin vetëlëndimin. TikTok-u pretendon nga ana e tij se siguria e të rinjve mbetet prioritet kryesor i kompanisë.
Disa vende të BE-së, përfshirë Francën, Spanjën dhe Greqinë, kohët e fundit i kanë bërë thirrje Brukselit për rregullim më të rreptë të platformave online për fëmijët, për shkak të shqetësimeve mbi varësinë, bullizmin dixhital dhe gjuhën e urrejtjes të përdorur aty.
Top Channel
