U përfshi në skandalin e Jeffrey Epstein, Keir Starmer shkarkon nga detyra Ambasadorin britanik në SHBA 11/09 12:00
Shtetet e Bashkuara po shënojnë 24-vjetorin e sulmeve terroriste të 11 Shtatorit 2001 me ceremoni solemne, vepra vullnetare dhe aktivitete përkujtimore kushtuar gati 3 mijë viktimave.
Të afërmit e të ndjerëve, përfaqësues shtetërorë dhe figura politike u mblodhën sot në New York, në Pentagon dhe në Shanksville të Pensilvanisë për të nderuar jetët e humbura. Ndërkohë, të tjerë zgjodhën mënyra më intime për ta përjetuar ditën, përmes aktiviteteve familjare dhe shërbimeve komunitare.
James Lynch, që humbi babanë e tij, Robert Lynch, në sulmet ndaj Kullave Binjake, tha se për familjen e tij dhimbja është gjithmonë e pranishme. “Është një nga ato ndjenja që nuk ikin kurrë. Por gjetja e gëzimit brenda atij pikëllimi ka qenë pjesë e rritjes time,” tha ai, ndërsa mori pjesë në një aktivitet bamirësie në Manhattan, ku mijëra vullnetarë po përgatisnin ushqime për familjet në nevojë.
Siguri e shtuar pas vrasjes së Charlie Kirk
Përkujtimet e këtij viti zhvillohen në një klimë politike të tensionuar, vetëm një ditë pas vrasjes së aktivistit konservator Charlie Kirk në një universitet të Utah-ut. Autoritetet kanë paralajmëruar masa shtesë sigurie, veçanërisht në ceremoninë në Ground Zero.
Ceremonitë zyrtare
New York – Në memorialin kombëtar të 11 Shtatorit, familjarët lexuan emrat e viktimave, ndërsa momente heshtjeje shënuan orët kur avionët e rrëmbyer goditën Kullat Binjake. Në ceremoni morën pjesë edhe nënpresidenti JD Vance me bashkëshorten e tij.
Pentagon – 184 viktimat e goditjes në selinë e ushtrisë amerikane u nderuan në një shërbim ku morën pjesë Presidenti Donald Trump dhe Zonja e Parë Melania Trump, para se të udhëtonin drejt Bronxit për një ndeshje bejsbolli.
Shanksville, Pennsylvania – Sekretari i Çështjeve të Veteranëve, Doug Collins, mori pjesë në përkujtimin e pasagjerëve të Flight 93, të cilët humbën jetën duke u përpjekur të ndalonin rrëmbyesit.
Trashëgimia e 11 Shtatorit
Sulmet e Al-Kaedës vranë 2,977 persona, përfshirë punonjës financiarë, zjarrfikës dhe policë që u përpoqën të shpëtonin jetë. Pasojat u ndjenë globalisht, duke çuar në “Luftën Globale kundër Terrorizmit”, pushtimet amerikane në Afganistan e Irak dhe konflikte që morën jetët e qindra mijëra ushtarëve dhe civilëve.
Ndërkohë, procesi ligjor ndaj Khalid Sheikh Mohammed, i dyshuari kryesor si organizatori i sulmeve, mbetet i papërfunduar, edhe pse ai u kap në vitin 2003 dhe u dërgua në Guantánamo Bay.
Në vitet që pasuan, qeveria amerikane ka shpenzuar miliarda dollarë për shëndetin dhe kompensimin e dhjetëra mijëra njerëzve të ekspozuar ndaj pluhurit toksik në Manhattan. Më shumë se 140,000 persona vazhdojnë të jenë pjesë e programeve monitoruese për të identifikuar sëmundjet e lidhura me pasojat e katastrofës.
Top Channel
