Bayrou do japë sot dorëheqjen, ja kush janë pasardhësit e tij të mundshëm për karrigen e kryeministrit

Vetë Bayrou, i cili kishte thirrur procesin e besimit duke u përpjekur të mbështeste paketën e rreptë të shkurtimeve me vlerë 44 miliardë euro për të ulur borxhin, njoftoi se do të paraqiste dorëheqjen e tij sot.

Presidenti Emmanuel Macron, përballë ndryshimit të gjashtë të kryeministrit në mandatin e tij që nga viti 2017, ka përjashtuar mundësinë e zgjedhjeve të parakohshme. Në një deklaratë, ai tha se kishte “marrë parasysh rezultatin” dhe do të emëronte një kryeministër të ri “në ditët në vijim”. Sipas informacioneve nga AFP, zgjedhja mund të shpallet që sot.

Skenarët e trashëgimisë po qarkullojnë fuqishëm në Paris. Më të njohurit janë personalitete me përvojë dhe një marrëdhënie të ngushtë besimi me Macron, siç janë Ministri i Drejtësisë Géral Darmanin dhe Ministri i Mbrojtjes Sébastien Lecony. Ministrja e Shëndetësisë Catherine Vautrin dhe Ministri i Financave Eric Lombard janë gjithashtu në listë.

Përveç kabinetit, emra jashtë qeverisë janë gjithashtu në tryezë. Raphael Glucksmann, udhëheqës i një lëvizjeje të majtë progresive, dhe ish-kryeministri Bernard Cazeneuve, me një mandat në Partinë Socialiste, konsiderohen opsione të mundshme që mund të zgjerojnë ekuilibrin politik.

Rënia e Bayrou e bën atë kryeministrin e gjashtë që largohet nën drejtimin e Macron, pas Edouard Philippe, Jean Castex, Elisabeth Born, Gabriel Attal dhe Michel Barnier. Rotacioni i vazhdueshëm i kryeministrave tregon vështirësinë për presidentin për të ruajtur ekuilibra të qëndrueshëm në Asamblenë Kombëtare, veçanërisht pas zgjedhjeve që nuk dhanë një shumicë absolute.

Pyetja tani është nëse zgjedhja e re do të jetë në gjendje të sigurojë stabilitetin e qeverisë dhe të miratojë reformat e nevojshme ekonomike, ndërsa opozita kërkon të shfrytëzojë prishjen politike të Macron për të kërkuar zgjedhje të parakohshme.

Top Channel