“Momenti i tyre nuk ka ardhur ende”/ Po shkëlqejnë me gola në startin e sezonit të ri, kush janë lojtarët shqiptarë që Sylvinho nuk i grumbulloi as këtë herë

Tekniku brazilian mendon se lojtarët e rinj duhet të presin, ndërsa duhen vlerësuar ata që kanë qenë me Kombëtaren në 6 muajt e fundit, edhe pse disa prej tyre nuk kanë minuta me klubet ku luajnë.

Por cilët janë disa prej lojtarëve kuqezi, të cilët kanë shkëlqyer në startin e këtij sezoni, por ende u lanë jashtë listës.

I pari është Anis Mehmeti. Fantazisti kuqezi e ka nisur në mënyrën më të mirë sezonin, duke shënuar në ndeshjen e parë të Championship, duke u kthyer gjithashtu në një titullar të padiskutueshëm për Bristol City.

24-vjeçari nuk është grumbulluar me Kombëtaren që nga qershori i vitit 2023, teksa me ekipin e parë të kuqezinjve ka zhvilluar vetëm tre ndeshje, të trija si zëvendësues.

Emri i dytë vjen sërish nga Anglia. Ish-sulmuesi i Kombëtares U-21, Armando Dobra, gjithashtu e ka nisur mjaft mirë sezonin. I natyralizuar nga trajneri në pozicionin e fantazistit, Dobra deri më tani ka shënuar dy gola këtë sezon në 6 ndeshje, ku në të gjitha prej tyre ka luajtur si titullar.

Gjithsesi, 24-vjeçari ende nuk e ka marrë një ftesë nga ekipi A i Kombëtares.

Një tjetër titullar i padiskutueshëm me skuadrën e tij është edhe Cristian Shpendi, i cili shënoi dhe gol në ndeshjen e fundit me Cesenan. Edhe pse sezoni që lamë pas ishte mjaft i mirë për 22-vjeçarin, i cili realizoi 11 gola me ekipin italian, ai nuk u thirr nga Sylvinho, me trajnerin brazilian që zgjodhi të mos e grumbullonte as këtë herë.

Dëmtimi i Alen Sherrit liroi një vend sa i përket portierëve, por Sylvinho vendosi ta linte bosh dhe mos ta zëvendësonte. Duket se zërat rreth një përplasjeje me Etrit Berishën përpara Europianit kanë qenë të vërteta. Kjo pasi 36-vjeçari ka shkëlqyer me Hacken në Suedi, duke ndihmuar ekipin suedez të kualifikohet në Conference League me ekipin e tij.

Top Channel