Short i manipuluar? Fansat shpërthejnë në rrjet pas ndeshjeve të zgjedhura nga algoritmi: Rikthimet e Arnold dhe De Bruyne, të dyshimta

UEFA bëri të ditur se shorti për fazën e ligës u realizua në mënyrë tërësisht automatike nga një kompjuter, duke respektuar një sërë kushtesh që synojnë të shmangin konfliktet në orare dhe vende. Por pavarësisht automatizimit, disa çifte të krijuara nga shorti kanë ngjallur reagime të forta, duke nxitur teoritë e konspiracionit në rrjetet sociale.

Një nga përballjet më të përfolura është rikthimi i Trent Alexander-Arnold në Anfield, këtë herë si lojtar i Real Madridit, pas largimit nga Liverpooli me parametra zero këtë verë – një veprim që la shumë tifozë të kuq të zhgënjyer.

Ndërkohë, Kevin De Bruyne, tashmë pjesë e Napolit, do të rikthehet në Etihad Stadium për t’u përballur me ish-skuadrën e tij, Manchester Cityn, klub ku ai shkëlqeu për një dekadë.

Këto përballje kanë bërë që tifozët të shpërthejnë në platformën X (ish-Twitter).

Njëri shkroi: “TAA përballë Liverpoolit dhe KDB ndaj Cityt. Mos më thoni që nuk është manipuluar!”

Një tjetër shtoi: “Trent në Anfield, KDB në Etihad, derbi i Bertas… gjithçka duket e programuar!”

Një tifoz i Liverpoolit lidhi gjithashtu edhe rikthimin e afrimit të ri të ekipit, Hugo Ekitike, përballë ish-skuadrës së tij Eintracht Frankfurt, duke shkruar: “100% është manipuluar. Trent në Anfield dhe Hugo në Frankfurt!”

Ndërkohë, ndeshjet me “ngarkesë” emocionale nuk ndalen këtu.

Arsenali, gjysmëfinalist i edicionit të kaluar, do të presë legjendën e Tottenhamit, Harry Kane, që tashmë udhëheq ofensivën e Bayern Munich.

Po ashtu, Liverpooli do të përballet sërish me një nga “armiqtë” më të mëdhenj në Evropë – Atletico Madridin e Diego Simeone-s, në një tjetër rikthim në Anfield që garanton emocione dhe tension.

Nëse këto janë thjesht rastësi të algoritmit apo diçka më shumë, mbetet për t’u parë. Por një gjë është e sigurt: sezoni i ri i Ligës së Kampionëve pritet të jetë spektakolar.

Top Channel