Anëtarët e Këshillit të Sigurimit të OKB-së përveç SHBA-së lëshojnë deklaratë për situatën në Gaza: Uria po shkaktohet nga njeriu 27/08 22:54
Ish-kryeministri britanik Tony Blair do të marrë pjesë në një takim të nivelit të lartë në Uashington, të kryesuar nga ish-presidenti amerikan Donald Trump, për të diskutuar planet për Gazën pas përfundimit të konfliktit.
Lajmi është konfirmuar nga BBC. Ndërkohë, sipas faqes së lajmeve Axios, në takim do të jetë i pranishëm edhe dhëndri dhe ish-këshilltari i lartë i Trump, Jared Kushner.
Tema kryesore do të jetë rritja e ndihmës humanitare për territorin palestinez. Emisari amerikan për Lindjen e Mesme, Steve Witkoff, ka deklaruar se SHBA po harton një plan “shumë gjithëpërfshirës” për të ashtuquajturin “dita e nesërme” pas përfundimit të luftës.
Takimi zhvillohet në një moment kritik, teksa forcat izraelite po intensifikojnë ofensivën në qytetin e Gazës. Ushtria izraelite ka paralajmëruar se evakuimi i qytetit është i pashmangshëm, ndërsa tanket izraelite janë futur në zona të reja të qytetit gjatë natës, duke shkatërruar shtëpi dhe duke detyruar banorët të largohen.
Dëshmitarët raportojnë për zhvendosje masive, me mijëra njerëz që janë detyruar të largohen nga shtëpitë e tyre. Rreth një milion palestinezë ende banojnë në Gaza, megjithatë shumë prej tyre tashmë janë në lëvizje për të gjetur strehim më të sigurt.
Izraeli ka shpallur që në fillim të gushtit planin për të pushtuar të gjithë Rripin e Gazës, përfshirë qytetin e Gazës, të cilin e cilëson si bastionin e fundit të Hamasit.
Ndërkohë, Kombet e Bashkuara dhe organizatat joqeveritare kanë ngritur alarmin se një ofensivë e plotë në qytetin e Gazës, ku javën e kaluar është shpallur zyrtarisht uri, do të kishte një pasojë humanitare katastrofike.
Top Channel
