Inspektori Klajdi Mustaj i cili shpëtoi tre qytetarë të plagosur gjatë një aksidenti në aksin rrugor Levan-Fier është nderuar me Certifikatën për Shërbime të Dalluara.
Gjatë mbrëmjes së djeshme në Qafë Koshovicë, një automjet tip “Benz” doli nga rruga dhe u përmbys.
Në mjet udhëtonin katër persona, tre prej të cilëve mbetën të plagosur dhe u transportuan me urgjencë në spitalin e Fierit për të marrë ndihmë mjekësore.
Mësohet se njëri prej tyre, një 17-vjeçar, ndodhet në gjendje të rëndë për jetën.
Mesazhi i Drejtorit të Përgjithshëm Ilir Proda:
“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë i punonjësit tonë në shpëtimin e tre bashkëqytetarëve është shembull frymëzues për të gjithë trupën policore. I shpreh mirënjohjen time dhe të gjithë Policisë së Shtetit për këtë akt human e profesional. Faleminderit për guximin dhe zemrën e madhe që tregove në shërbim të qytetarëve.
Angazhimi, përkushtimi, profesionalizmi, sakrifica, ndershmëria dhe humanizmi duhet të jenë motoja jonë në përmbushjen e detyrës, fytyra dhe imazhi i ri i Policisë së Shtetit.”
Inspektor Klajdi Mustaj është pjesë e Policisë së Shtetit prej shkurtit 2024, kur përfundoi Kolegjin Profesional për Patrullë të Përgjithshme. Ka përfunduar studimet për Shkencat Juridike (Bachelor) dhe aktualisht vazhdon studimet për Master.
Top Channel
