Sulmi në shkollën katolike në Minneapolis, rikthehet debati për ndalimin e armëve në SHBA 28/08 22:50
Rouzbeh Vadi, për të cilin media shtetërore iraniane tha se u ekzekutua të mërkurën për dhënien e informacionit në lidhje me programin bërthamor të Teheranit te Mossad, agjencia izraelite e spiunazhit, ishte vetë një shkencëtar bërthamor, raportoi të mërkurën transmetuesi shtetëror iranian IRIB.
Agjencia iraniane e lajmeve Mizan raportoi të mërkurën se një qytetar iranian, i identifikuar si Vadi, është dënuar për spiunazh në favor të Izraelit, si dhe për dhënie informacioni mbi një shkencëtar bërthamor, i cili u vra në qershor gjatë një prej sulmeve ajrore izraelite mbi Iranin.
Sipas raportit, Vadi ka pranuar në një video të publikuar nga televizioni shtetëror IRIB se kishte transmetuar informacione në lidhje me objektet bërthamore iraniane, përfshirë uzinat e pasurimit të uraniumit në Fordow dhe Natanz.
“U thashë atyre se dija diçka për Fordow dhe ata (agjentët e Mossadit) më thanë të dërgoja gjithçka,” dëgjohet të thotë Vadi në video.
Ai gjithashtu përmend se hyrja dhe dalja e materialit bërthamor në Uzinën e Konvertimit të Uraniumit (UCF) dhe në Uzinën e Fabrikimit të Karburantit (FMP) ishin të një rëndësie të madhe për Izraelin. Vadi, i cili mban një doktoraturë në fizikë bërthamore nga Universiteti i Teknologjisë Amir Kabir, raportohet se është takuar pesë herë me agjentë të Mossadit në Vjenë, ku i ishte kërkuar të hapte një llogari kriptomonedhe për të marrë pagesat për informacionin e dhënë.
Në video thuhet se Mossadi i kishte premtuar një pasaportë të huaj në këmbim të bashkëpunimit afatgjatë.
Autoritetet iraniane kanë intensifikuar ndjeshëm ekzekutimet e personave të dënuar për spiunazh në favor të Izraelit gjatë këtij viti – me të paktën tetë raste të raportuara vetëm në muajt e fundit.
Këto zhvillime ndodhin në një periudhë tensioni të lartë midis dy shteteve. Në qershor, Izraeli kreu një fushatë 12-ditore të sulmeve ajrore, duke synuar gjeneralë të lartë iranianë, shkencëtarë bërthamorë dhe objekte strategjike. Irani u kundërpërgjigj me një breshëri raketash dhe dronësh të lëshuar drejt territorit izraelit, duke rritur më tej përplasjen mes dy vendeve.
Top Channel
