Shtëpia e Bardhë shpërthen ndaj Politico-s pas artikullit për të dërguarin special të Trump, Vance: Gazetari e dobët dhe operacion me ndikim të huaj 29/08 23:01
Presidenti rus Vladimir Putin nuk ka gjasa t’i nënshtrohet ultimatumit të sanksioneve nga presidenti amerikan, Donald Trump që skadon këtë të premte dhe ruan qëllimin për të kapur katër rajone të Ukrainës në tërësi, thanë burime pranë Kremlinit për Reuters.
Trump ka kërcënuar të godasë Rusinë me sanksione të reja dhe të vendosë tarifa 100% për vendet që blejnë naftën e saj nëse Putin nuk pranon një armëpushim në luftën e Rusisë në Ukrainë.
Vendosmëria e Putinit për të vazhduar nxitet nga besimi i tij se Rusia po fiton dhe nga skepticizmi se edhe më shumë sanksione të SHBA-së do të kenë një ndikim të madh pas valëve të njëpasnjëshme të ndëshkimeve ekonomike gjatë 3 vjet e gjysmë lufte, sipas tre burimeve të njohura me diskutimet në Kremlin.
Udhëheqësi rus nuk dëshiron ta zemërojë Trumpin dhe e kupton se mund të jetë duke refuzuar një shans për të përmirësuar marrëdhëniet me Uashingtonin dhe Perëndimin, por qëllimet e tij të luftës kanë përparësi, thanë dy nga burimet.
Qëllimi i Putinit është të pushtojë plotësisht rajonet ukrainase të Donetskut, Luhanskut, Zaporizhzhisë dhe Khersonit, të cilat Rusia i ka pretenduar si të vetat dhe më pas të flasë për një marrëveshje paqeje, tha një nga burimet.
“Nëse Putin do të ishte në gjendje t’i pushtonte plotësisht ato katër rajone që ai i ka pretenduar për Rusinë, ai mund të pretendonte se lufta e tij në Ukrainë i kishte arritur objektivat e tij”, tha James Rodgers, autor i librit të ardhshëm “Kthimi i Rusisë”.
Procesi aktual i bisedimeve, në të cilin negociatorët rusë dhe ukrainas janë takuar tre herë që nga maji, ishte një përpjekje nga Moska për të bindur Trumpin se Putin nuk po e refuzonte paqen, tha burimi i parë, duke shtuar se bisedimet ishin të privuara nga substanca reale përveç diskutimeve mbi shkëmbimet e të burgosurve.
Rusia thotë se është serioze në lidhje me arritjen e një paqeje afatgjatë në negociata, por se procesi është i ndërlikuar sepse qëndrimet e të dy palëve janë shumë larg njëra-tjetrës. Putin javën e kaluar i përshkroi bisedimet si pozitive.
Kërkesat e deklaruara të Moskës përfshijnë një tërheqje të plotë të Ukrainës nga katër rajonet dhe pranimin nga Kievi të statusit neutral dhe kufizimeve në madhësinë e ushtrisë së saj kërkesa të refuzuara nga Ukraina.
Në një shenjë se mund të ketë ende një mundësi për të arritur një marrëveshje para afatit, i dërguari special i Trump, Steve Witkoff, pritet të vizitojë Rusinë këtë javë, pas një përshkallëzimi të retorikës midis Trump dhe Moskës mbi rreziqet e luftës bërthamore.
Të hënën, Rusia tha se nuk ishte më e detyruar nga një moratorium mbi raketat bërthamore me rreze të shkurtër dhe të mesme veprimi.
Kremlini nuk iu përgjigj një kërkese për koment për këtë artikull. Të gjitha burimet folën me Reuters në kushte anonimiteti për shkak të ndjeshmërisë së situatës.
Trump, i cili në të kaluarën e ka lavdëruar Putinin dhe ka ofruar mundësinë e marrëveshjeve fitimprurëse biznesi midis dy vendeve të tyre, kohët e fundit ka shprehur padurim në rritje me presidentin rus. Ai është ankuar për atë që i quajti “budallallëqe” të Putinit dhe e përshkroi bombardimin e pamëshirshëm të Kievit dhe qyteteve të tjera ukrainase nga Rusia si “të neveritshme”.
Kremlini ka thënë se i ka vënë re deklaratat e Trump, por ka refuzuar t’u përgjigjet atyre.
Top Channel
