Kujdes çfarë klikoni, sepse mund të përfundoni viktima të hakerave të cilët ndërhyjnë në të dhënat tuaja kompjuterike, falsifikojnë dhe ju zhvasin.
Trendi i krimeve online u rendit nga zyrtarja Ervina Gjana, bazuar në kallëzimet e dhjetëra të dëmtuarve që kanë kërkuar ndihmë në polici.
“Qytetarët duhet të kujdesen çfarë klikojnë, në çdo mesazh që u vjen, të kujdesen për mesazhet që janë të bashkëngjitura (attach), duke besuar se janë mesazhe që vijnë nga banka, japin të dhënat bankare, duke rënë pre e mashtrimeve dhe vjedhjeve etj.”, thotë drejtoresha e hetimit të krimeve kibernetike, Ervina Gjana.
Kjo listë e afishuar në hyrje të Gjykatës së Posaçme u përket disa proceseve ku të dëmtuarit janë shtetas të huaj që morën thirrjen mashtruese përmes call center-ave dhe që hetimet mes SPAK dhe të huajve kanë sjellë goditjen e disa grupeve. Aksioni më i fundit i kryer me gjermanët u kodua “Pandora” dhe nga kutia e këtij hetimi u zbuluan 12 qendra mashtruese, tetë persona që vepronin si oficerë të rremë që u premtonin shtetasve gjermanë rikuperimin e dëmeve, ose që kryenin mashtrim në investime.
Në konferencën e përbashkët, Oliver Hoffman tha se grupi vepronte i vendosur në 5 shtete.
“Nëpërmjet krijimit të qendrës policore të thirrjeve, nga 7.5 mijë raste të konstatuara, arritëm të pengonim 6 mijë të tilla. Edhe kur ishin raste transfertash bankare. Parandaluam humbjen e parave në një vlerë prej 1 milionë eurosh. E mbajtëm të ulët dëmin e shkaktuar. Sa i përket të dëmtuarve në Gjermani, ata duhet të nisin një proces civil me Shqipërinë, me qëllim që t’u kthehet dëmi i shkaktuar. Nuk është proces i lehtë, ne jemi gati t’i ndihmojmë me konsulencë”, thotë Hoffman.
E ndërsa dëmi më i fundit nga ky hetim llogaritet të jetë 363 mijë euro me 14 qytetarë gjermanë të mashtruar, pyetjes së TCH nëse ka apo jo ende call center-a që veprojnë si grup kriminal, prokurori i çështjes i dha këtë përgjigje:
Aktualisht SPAK po heton disa çështje për pastrim parash të fituara përmes kësaj skeme.
Top Channel
