Një polic është vënë në pranga në Elbasan në akuzë për veprën penale “shtrëngim me anë të kanosjes ose dhunës për dhënien e pasurisë”.
Nënkomisari u jepte hua (fajde) personave të ndryshëm dhe më pas nëpërmjet kanosjes ose dhunës i shtrëngonte këta të fundit për kthimin e vlerave të konsiderueshme të parave, njofton AMP.
Gazetarja e Top Channel, Anila Hoxha, raporton se para një viti, efektivi i kishte dhënë shtatë mijë euro borxh një shtetasi që jepte makina me qira dhe pas kësaj i thoshte se “paratë ishin me fajde”.
Shtetasi që jepte makina me qira bashkëpunoi me AMP-në dhe tregoi se si kërcënohej, ndërsa pretendon se çdo muaj jepte 1 mijë apo 1500 euro.
Çështja po hetohet ende, teksa Edison Pema mohon të ketë kërcënuar biznesmenin, që merrej me tregtinë e mjeteve me qira.
Top Channel
