Rëndohet bilanci i viktimave nga sulmet ruse në Ukrainë, zyrtarët: Rusia lëshoi mbi 200 dronë dhe 30 raketa 26/07 18:59
Presidenti bjellorus, Alexander Lukashenko bëri thirrje për normalizimin e marrëdhënieve midis vendit të tij, i cili është nën sanksione të rënda perëndimore, dhe Shteteve të Bashkuara, në një telegram drejtuar homologut të tij amerikan, Donald Trump.
“Gjatë presidencës suaj të parë, Minsk dhe Uashingtoni hapën rrugën për normalizimin e marrëdhënieve”, tha Lukashenko në mesazhin e tij drejtuar Trump me rastin e Ditës së Pavarësisë së SHBA-së, të cituar nga shërbimi i tij për shtyp.
“Fatkeqësisht, në një moment bashkëpunimi bjelloruso-amerikan devijoi nga ky kurs pozitiv”, vuri në dukje ai, duke shtuar se kjo situatë nuk korrespondon me interesat kombëtare të asnjërit shtet.
“Është koha ta ndryshojmë atë”, vuri në dukje Lukashenko, i cili është në pushtet që nga viti 1994, duke shtuar se shpreson për rivendosjen e një dinamike pozitive të kontakteve ndërshtetërore dhe zbatimin e projekteve të bashkëpunimit me përfitim të ndërsjellë.
Që nga kthimi në Shtëpinë e Bardhë në janar, administrata e Donald Trump është zhvendosur drejt afrimit me Rusinë, një aleat kyç i Bjellorusisë, territori i të cilit shërbeu si bazë për forcat ruse për pushtimin e tyre të Ukrainës në shkurt 2022 dhe mbi të cilën janë vendosur sanksione të shumta perëndimore.
Kjo ngrohje e marrëdhënieve SHBA-Rusi ka rezultuar në muajt e fundit kryesisht në lirimin ose shkëmbimin e të burgosurve amerikanë në Rusi.
Nga ana e saj, Bjellorusia liroi figurën e opozitës Sergei Tikhanovsky, bashkëshortin e Svetlana Tikhanovskaya e cila mori detyrën si udhëheqëse e opozitës kur ai u arrestua, në fund të qershorit me kërkesë të Donald Trump, sipas Minskut.
Njoftimi për lirimin e Tikhanovsky, i cili ishte burgosur që nga viti 2020, erdhi disa orë pasi Lukashenko u takua me të dërguarin e SHBA-së Keith Kellogg në Minsk, zyrtari më i lartë i SHBA-së që viziton Bjellorusinë në vite, sipas agjencisë zyrtare bjelloruse të lajmeve Belta.
Top Channel
