Përfundon takimi i Trump me Këshillin e Sigurisë, Presidenti: Mund të bashkojmë forcat me Izraelin për goditjen e armëve bërthamore të Iranit 17/06 22:44
Futbolli francez është në zi: Bernard Lacombe, një nga emrat më të shquar të këtij sporti në vend, ka ndërruar jetë në moshën 72-vjeçare, pas disa muajsh të kaluar në spital që nga janari i këtij viti.
Lajmi u konfirmua këtë të martë dhe ka tronditur jo vetëm tifozët e Olympique Lyon, por edhe gjithë komunitetin sportiv në Francë dhe më gjerë.
Lacombe ka qenë një figurë qendrore në historinë e futbollit francez për më shumë se pesë dekada – si futbollist, trajner, drejtues dhe këshilltar.
Me 255 gola të shënuar në elitën e futbollit francez, ai mbetet golashënuesi më i mirë francez në historinë e Ligue 1, me fanellat e Lyon, Saint-Étienne dhe Bordeaux. Në arenën ndërkombëtare, ai ka qenë pjesë e kombëtares franceze në 38 ndeshje dhe ka qenë kampion i Evropës në vitin 1984, në skuadrën e udhëhequr nga Michel Platini.
I lindur në Fontaines-sur-Saône, djalë kasapi dhe mësuar me zanatin e saldatorit, Lacombe realizoi ëndrrën e tij që në moshën 17-vjeçare kur debutoi për Lyon më 7 dhjetor 1969 dhe shënoi që në ndeshjen e parë kundër Red Star.
Me një stil loje inteligjent dhe teknikë të rafinuar, ai u bë një nga sulmuesit më të kompletuar të kohës: dykëmbësh, me ndjeshmëri të jashtëzakonshme për vendosjen dhe pasimin, efikas si me kokë ashtu edhe me topin në këmbë.
Në Botërorin e vitit 1978, ai shënoi golin më të shpejtë të turneut – vetëm 38 sekonda pas fillimit të ndeshjes kundër Italisë. Për Francën, ai do të ishte pjesë e brezit që arriti deri në gjysmëfinalen e Euro 1984, turne që më pas do të kurorëzonte “Les Bleus” si kampionë.
Pjesa më e gjatë dhe më e ndjerë e karrierës së tij ishte e lidhur me Olympique Lyonnais, aty ku ai jo vetëm u formua si lojtar, por edhe la gjurmë si drejtues dhe trajner. Pas përfundimit të karrierës së tij si futbollist (me suksese të mëdha edhe me Bordeaux), ai u rikthye te klubi i zemrës në vitin 1988, thirrur nga presidenti Jean-Michel Aulas për të ndihmuar në rindërtimin e Lyon që ndodhej në Ligue 2.
Nga drejtor sportiv (1988–1996), te trajner i ekipit të parë (deri në vitin 2000) dhe më pas këshilltar i ngushtë i presidentit Aulas deri në vitin 2019, Lacombe ishte arkitekt i ngritjes spektakolare të Lyon, që fitoi 7 kampionate radhazi të Ligue 1 nga 2002 deri në 2008, dhe arriti në gjysmëfinalen e Ligës së Kampionëve në vitin 2010.
Për Lyonin, Bernard Lacombe ishte më shumë se një legjendë. Ai ishte memoria e klubit, një lidhje e gjallë mes brezave të ndryshëm, një njeri që mund të përshkruante çdo ndeshje të rëndësishme me datë, rezultat dhe golashënues. Të dëgjoje Bernard Lacombe ishte si të lexoje një faqe të verdhë nga një almanak historik i futbollit francez.
Me ndarjen e tij nga jeta, Franca humb një nga figurat më të dashura dhe më të respektuara të sportit të saj kombëtar. Emri i Bernard Lacombe do të qëndrojë gjithmonë në majat e historisë së futbollit – si futbollist, udhëheqës dhe njeri që i përkushtoi jetën e tij topit të rrumbullakët.
Top Channel
