Mblidhet në Bruksel Këshilli i Energjisë së BE: Prioritet ndalimi i gazit rus, pastaj propozimi për energjinë bërthamore 16/06 11:33
Mes valëve të vazhdueshme të përplasjeve midis Izraelit dhe Iranit, presidenti amerikan, Donald Trump po e bën të qartë publikisht dhe privatisht dëshirën e tij për t’i mbajtur Shtetet e Bashkuara jashtë konfliktit për momentin, i kujdesshëm se mos ngec në një luftë tjetër në Lindjen e Mesme dhe shumë i vetëdijshëm për ndryshimin e politikës së partisë së tij.
Burime të njohura me çështjen thonë se Izraeli ka folur me SHBA-në për mundësinë e rritjes së nivelit të përfshirjes së saj, megjithëse një zyrtar izraelit paralajmëroi se këto biseda nuk kanë përfshirë ende diskutime “praktike” mbi detajet më të imëta. Dhe ndërsa Trump shpreson të shmangë një konflikt të zgjatur që mund të destabilizojë më tej Lindjen e Mesme, disa në administratë e pranojnë se ndihma ushtarake amerikane mund ta ndihmojë Izraelin të përfundojë objektivat e tij më shpejt.
“Ne nuk jemi të përfshirë në të. Është e mundur që të përfshihemi. Por nuk jemi të përfshirë në këtë moment,” tha Trump për ABC News.
Interesat konkurruese kanë krijuar një dinamikë të ndërlikuar për një president të etur për të përmbushur premtimin e tij për të sjellë paqe në rajonet e trazuara të botës.
Që kur Izraeli nisi sulmin e parë të premten në mëngjes, SHBA-të i kanë ofruar mbështetje mbrojtëse Izraelit, duke penguar një sulm iranian.
Por Trump nuk është bashkuar me ushtrinë izraelite në përpjekjet e saj për të çmontuar objektet bërthamore të Iranit, duke i rezistuar presionit nga republikanët e tjerë për t’iu bashkuar luftës.
Ai tha në një postim në mediat sociale të shtunën se mendonte që konflikti “duhet të mbarojë”, ndërsa vazhdon të shpresojë për një marrëveshje të negociuar që do të frenonte ambiciet bërthamore të Teheranit.
Premtimi i Trump për të vepruar si një paqebërës global wshtw nw rrezik ose.
Ky premtim është vënë tashmë në provë nga paaftësia e tij për t’i dhënë fund konfliktit të Ukrainës dhe përpjekjet për të ndaluar luftimet në Gaza. Tani, ndërsa një pikë e re e nxehtë kërcënon të dalë jashtë kontrollit gjatë mandatit të Trump, ai po përpiqet të kufizojë përfshirjen e SHBA-së.
“SHBA-të nuk kishin të bënin fare me sulmin ndaj Iranit sonte”, shkroi Trump në Truth Social të shtunën vonë, mes një raundi të ri sulmesh në rajon.
“Nëse sulmohemi në çfarëdo mënyre apo forme nga Irani, forca dhe fuqia e plotë e Forcave të Armatosura të SHBA-së do të bjerë mbi ju në nivele të papara më parë. Megjithatë, ne mund të arrijmë lehtësisht një marrëveshje midis Iranit dhe Izraelit dhe t’i japim fund këtij konflikti të përgjakshëm!!!”, shkroi ai.
Postimi dërgoi mesazhin se linja e Trump për t’u përfshirë më drejtpërdrejt në sulmet e Izraelit do të ishte një sulm ndaj objekteve ose personelit amerikan në rajon. Përveç kësaj, roli i SHBA-së në konflikt deri më tani ka qenë kryesisht mbrojtës.
Operacioni izraelit kundër Iranit pritet të zgjasë “javë, jo ditë” dhe po ecën përpara me miratimin të SHBA-së, sipas Shtëpisë së Bardhë dhe zyrtarëve izraelitë.
Një zyrtar i Shtëpisë së Bardhë tha se administrata ishte në dijeni dhe mbështeste në planet e Izraelit. Kur u pyet se sa gjatë mund të vazhdonte konflikti, zyrtari tha se kjo varej nga përgjigja e Iranit.
“Administrata Trump beson fuqimisht se kjo mund të zgjidhet duke vazhduar negociatat me SHBA-në”, tha zyrtari, duke shtuar se SHBA-të nuk do ta udhëzonin Izraelin të bënte asgjë tjetër përveçse të mbrohej.
Planifikuesit ushtarakë amerikanë kanë përgatitur prej kohësh opsione për veprime të përbashkëta SHBA-Izrael kundër objekteve iraniane nëse president amerikan vendos përfundimisht të përpiqet të shkatërrojë objektet bërthamore të Iranit, disa prej të cilave gjenden thellë nën tokë.
Megjithatë, ka pak që tregojnë se Trump është afruar pranë miratimit të opsioneve të tilla, dhe sipas një zyrtari izraelit, mundësia e mbështetjes ofensive të SHBA-së për sulmet e Izraelit brenda Iranit nuk është diskutuar në një “bazë praktike”.
“Nëse në një moment, Shtetet e Bashkuara vendosin të marrin një rol ofensiv, nuk mendoj se do të jemi në një pozicion për t’u përpjekur t’i bindim ata të tërhiqen – por kjo nuk është kërkesa jonë”, tha një zyrtar izraelit, duke shtuar se një veprim i tillë do të ishte një vendim sovran i SHBA-së.
Zyrtari shpjegoi se qëllimi përfundimtar është të sigurohet që Irani “nuk është më një kërcënim ekzistencial” për Izraelin, si me programin e tij bërthamor ashtu edhe me atë të raketave balistike.
“Nëse bëhet në bashkëpunim me aleatët, në rregull, por nëse nuk bëhet në bashkëpunim me aleatët, duhet ta bëjmë vetë”, tha zyrtari.
Brenda Shtëpisë së Bardhë, vazhdon të ketë skepticizëm të madh në lidhje me përfshirjen e mëtejshme në konflikt, sipas shumë zyrtarëve të njohur me çështjen.
Trump mbetet i shqetësuar për t’u përfshirë në një luftë që nuk e nisi dhe që donte ta shmangte, dhe është shumë i vetëdijshëm për politikën e ndërlikuar në lojë, thanë këta zyrtarë.
Megjithëse ai e paralajmëroi publikisht Izraelin kundër nisjes së një sulmi ndaj Iranit përpara sulmeve të së premtes, ai tha më pas se e mbështeste përpjekjen dhe ishte shumë i vetëdijshëm se ajo po planifikohej.
“Për të paktën dy dekada, udhëheqësit politikë nga të dyja partitë e kanë tërhequr ushtrinë tonë në misione në të cilat nuk i takonin”, tha Trump.
“Ata i dërguan luftëtarët tanë në kombe që nuk donin të kishin të bënin fare me ne, të udhëhequr nga udhëheqës që nuk kishin ide në tokat e largëta”, tha ai, duke u zotuar të mos e përsërisë kurrë gabimin.
Tani, megjithatë, ai është nën presion nga disa prej aleatëve të tij republikanë për të marrë një rol më ndërhyrës.
“Nëse diplomacia dështon, të mbështesësh plotësisht Izraelin tregon se Amerika është rikthyer si një aleat i besueshëm dhe një forcë e fortë kundër shtypjes. Kjo do të forconte dorën tonë në të gjitha cepat e botës, si dhe në të gjitha konfliktet e tjera me të cilat përballemi”, shkroi senatori Lindsey Graham në X javën e kaluar.
Top Channel
