Një ngjarje tragjike ka tronditur qytetin e Grazit në Austri, ku një sulm i armatosur rezultoi me vdekjen e disa personave, përfshirë edhe një vajzë nga Kosova.
Kryetari i Komunës së Vitisë, Sokol Haliti, ka konfirmuar se mes viktimave është edhe Lea Bajrami, një vajzë e re nga kjo komunë.
Sulmi ndodhi gjatë orëve të paradites në një qendër për kujdesin e fëmijëve, ku një person i armatosur hapi zjarr në mënyrë të papritur, duke shkaktuar panik dhe viktima. Deri tani raportohet se nga sulmi kanë humbur jetën 10 persona, përfshirë edhe fëmijë të mitur, ndërsa autoritetet austriake kanë nisur një hetim të thelluar për zbardhjen e motiveve dhe rrethanave të këtij akti të rëndë.
Për humbjen e Leas, kryetari Haliti ka shprehur ngushëllime të thella për familjen Bajrami:
“E nderuara familje Bajrami, më pikëlloi pa masë lajmi për humbjen tragjike të vajzës suaj Lea nga Komuna e jonë, e cila humbi jetën në sulmin e rëndë që ndodhi sot në qytetin e Grazit në Austri. Kjo ngjarje na ka prekur të gjithëve thellësisht. Humbja e një jete të re, me ëndrra dhe shpresë për të ardhmen, është një plagë që lë gjurmë të pashlyeshme në shpirtin e secilit prej nesh.”
Ai shtoi se qytetarët e Vitisë janë pranë familjes në këtë moment të dhimbshëm dhe se kujtimi i saj do të mbetet i gjallë në zemrat e të gjithëve.
Ngjarja ka ngjallur reagime të shumta në opinionin austriak dhe ndërkombëtar, ndërsa autoritetet kanë përforcuar masat e sigurisë nëpër shkolla dhe institucione publike. Ende nuk është bërë publik identiteti i autorit të sulmit, ndërsa mediat lokale raportojnë për një të arrestuar që po merret në pyetje.
Top Channel
