Video/ Iggy Pop largohet nga skena e koncertin në Londër i futur në arkivol 02/06 10:26
Në Los Angeles është ndarë nga jeta aktori dhe kaskaderi amerikan Ed Gale, i njohur për interpretimet e tij unike në kinemanë e viteve 1980, përfshirë personazhin e kukullës Chucky në filmat kult “Child’s Play” (1988) dhe “Howard the Duck” (1986). Ai u shua në moshën 61-vjeçare.
Lajmin e bëri të ditur mbesa e tij, Kayse Gale, përmes një mesazhi prekës dhe me humor në Facebook:
“Me zemër të thyer — dhe me një arkivol çuditërisht të lehtë (e kuptoni lojën e fjalëve?) — njoftojmë ndarjen e papritur nga jeta të xhaxhait tonë, Ed Gale. Ai mori duartrokitjet e tij të fundit dhe tani është protagonist në jetën e përtejme. U nis për në Kaliforni në moshën 20 vjeç me vetëm 41 dollarë në xhep dhe një ëndërr. Dhe nuk u kthye kurrë pas.”
I lindur në Michigan në vitin 1963, Gale la shtëpinë e tij në moshë të re për të ndjekur ëndrrën në Hollywood. Me një gjatësi prej 103 cm për shkak të xhuxhizmit, ai ndërtoi një karrierë të pasur me mbi 130 role në filma, seriale televizive dhe reklama, shpesh duke luajtur role që kërkonin punë fizike intensive dhe duke veshur kostume komplekse.
Ndër rolet më të njohura është “Howard the Ross” në filmin “Howard the Duck”, ku zëri i personazhit ishte i aktorit Chip Zien. Në një intervistë të vitit 2018, Gale rrëfeu:
“Isha shumë i emocionuar me rolin, edhe pse nuk e dija kush ishte Howard. E vesha kostumin çdo ditë për gati dhjetë muaj.”
Por famën më të madhe e mori me interpretimin e kukullës Chucky në sagën horror “Child’s Play”. Ai luajti në filmin origjinal të vitit 1988 me regji të Tom Holland dhe në vazhdimin e tij në 1990, duke ndihmuar që ky personazh të bëhej një nga më ikonikët dhe frikësuesit në historinë e filmave horror.
Përveç këtyre, Gale luajti edhe në filma si “Spaceballs” (1987), “O Brother, Where Art Thou?” (2000) nga vëllezërit Coen, “The Polar Express” (2004, si aktor zëri) dhe “Tiptoes” (2003). Ai u shfaq gjithashtu në seriale televizive si “Baywatch” dhe “Dinosaurs Among Us”.
Ed Gale do të mbahet mend për talentin dhe pasionin e tij të pakrahasueshëm në ekran, duke lënë pas një trashëgimi të paharrueshme në botën e kinemasë.
Top Channel
